SCENA UNDICESIMA

Rosa, Luisella e detti.

ROSA (con cappello, pronta per uscire): Dunque, Feliciè, io vaco!

CONCETTA: D.ª Rosì, io me ne traso dinto. Ce vedimmo dimane! Sperammo che sia cosa da niente!

ROSA: Accussì sperammo!

CONCETTA: Bonasera, D. Felì. (Via per la comune.)

FELICE: Buonanotte.

LUISELLA (a Felice): Signò, vulite mangià mò o cchiù tarde?

ROSA: Tu nun te ne ncarricà! Tu haje ditto ch’haje accumpagnà lo nepote de D. Michele a lo cullegio? E va: pò te retire a la casa toja pe stasera, pecché ccà nun può stà!

LUISELLA Va bene. Ma a lo signore chi lo dà a mangià?

ROSA: Cheste so’ ccose che me l’aggia vedé io. Ch’è fatto na criatura de latte lo signore? Llà sta tutto pronto... l’acqua sta vullenno... se lo vvede isso!

LUISELLA: Comme vulite vuje! Allora, felicenotte, signurì. (Via a destra.)

ROSA: Felicenotte.

FELICE: Ma dicevo io... na vota ch’aggia rimané io sulo… me ne vado a mangià qualche cosa dinta a na trattoria...

ROSA: Dinta a la trattoria?... (Allarmata.) E quanno maje sì ghiuto pe dinto a la trattorie?...

FELICE: E che male ce sta?

ROSA: Tutto il male possibile! Chi te vede dinto a na trattoria lo cchiù ppoco se crede che simmo appiccecate! A na parte de chesta nc’avimma j sempe nzieme!...

FELICE (esasperato): Siente, ma chesto è troppo mò! Tu adderittura me vuò tènere comme nu schiavo?... E dàmme nu poco de libertà!

ROSA (fremendo): Seh!... Bravo!... E tu quanno maje haje parlato accussì?... Chesta è la cumpagnia de D. Michele!... È l’amico che t’ha mparato!

FELICE: Nun me l’ha mparato nisciuno!... È la molla che scatta!...

ROSA (sardonica): Ah! È la molla che scatta?... Dunque tu cuve ncuorpo? Tiene la mala ntenzione?... Me tratte cu politica?... E va bene! (Con decisione.) E allora io mò te chiudo da dinto!... Si vuò mangià, mange... si no, staje diùno! Diùno comme a nu cane!

FELICE: Rusì, nun facimmo pazzìe... pecché si no me nquarto seriamente!

ROSA: Te nquarte seriamente?... E de che manera... de che manera?...

FELICE (con tono comicamente autoritario): Faccio il marito!...

ROSA: Faje lo marito?... E teh!... (Gli dà uno schiaffo poi esce dalla destra. La si sente chiudere la parta a chiave.)

FELICE: Sangue de la morte... chella overo m’ha chiuso da dinto!... (Corre alla porta e chiama.) Rusì... Rusì... arape la porta!

ROSA (dall’interno): Ce vedimmo a mezanotte... o pure dimane mmattina! Statte buono!...

FELICE: Rusì... arape la porta!... (Scuote la porta.) Rusì... mall’arma de mammeta!... Rosìna... (Carezzevole.) simpaticona mia... angioletto mio... (Cambiando tono.) Ppuh, pe la faccia toja! (Viene avanti.) E come faccio? Comme vaco a piglià a D.ª Cuncettina?... Mannaggia a lo mumento che me nzuraje... Chella m’ha rimasto carcerato!... (Come colpito da un pensiero.) Ah!... (Corre al cassettone che è in fondo a destra, ne apre un cassetto e prende una chiave.) S’è scordata che ccà ce sta n’ata chiave de sta porta... eh, sangue de la morte… (Va alla porta e prova ad aprire. La porta resiste.) Puozze passà nu guajo!.. (Scoraggiato.) Ha chiuso e ha menato pure lo maniglione! Sono perduto… so’ rovinato!... (Improvvisamente si rischiara, illuminato da un’altra idea.) Statte!... Chillu fenestiello sporge dinto a lo ciardino... Benissimo!... Cielu mio aiuteme tu... (Prende la scala a pioli, e con essa raggiunge il finestrino infilandovi le gambe. L’uscita non è agevole.) E come faccio?... Aspetta... qua bisogna fare un po’di ginnastica… ecco fatto! (Dà in un grido di dolore.) Ah!... Me so’ pugnuto nfaccia all’erba de muro! (Mentre cerca discendere si sente abbaiare fortemente il cane.) Misericordia... nu cane!.. Passa llà... Passa llà... Passa llà... (Mentre Felice grida e si dimena spaventato ed il cane continua ad abbaiare, cala la tela.)

Fine dell’atto primo