SCENA DECIMA

Luciella, e detti.

LUCIELLA: Li maccarune stanno ntavola.

FELICE (a Luciella): (Sto pranzo da dò è asciuto?).

LUCIELLA: (Da lo trattore vicino...).

BARTOLOMEO: Jammo, jammo a mangià, non ne sia niente più. Viene, Feliciè, mò veramente te voglio cchiù bene de primma. Signor D. Luigi date il braccio a mia figlia.

GIULIO: Subito. Mi fo un dovere. (Esegue, andandosene.) (Amalia mia!)

AMALIA: (Giulio de sto core!). (Viano.)

BARTOLOMEO: Viene, Feliciè, viene, chesta cosa mi ha fatto smovere cchiù l’appetito. (Via.)

FELICE: Luciè, chisto chi è?

LUCIELLA.: Comme chi è? E lo cuoco vuosto, vuje l’avite ditto... venite a mangià, venite a mangià. (Via.)

FELICE: Ne, guè, chi cancaro sì tu? Da dò sì venuto? Chi t’ha mannato? Parla mmalora!...

PULCINELLA: Che volite sapè?

FELICE: Tu chi sì?

PULCINELLA: Io songo Monzù Pastabignè, lo cuoco vuosto, vuje l’avite ditto; certamente non avite ditto buscia.

FELICE: Comme... io...

PULCINELLA: Vuje site lo patrone mio. Vuje me date 30 ducate a lo mese, e io ve servo...

FELICE: Ma siente...

PULCINELLA: Mò non pozzo darve retta, tengo li brasciole ncoppa a lo fuoco, me metto paura che non pigliano sotto... dateme licenzia...

FELICE: Ma...

PULCINELLA: Non pozzo... le brasciole me premeno assaje. (Via seguito da Felice.)

(Cala la tela.)

Fine dell’atto primo