SCENA PRIMA

Andrea, poi Carluccio.

ANDREA (è presso la scala nel corridoio e parla verso il piano sottostante): Buon viaggio, signori... buon viaggio e presto ritorno... Non sentite chiacchiere... sono tutte fandonie! (Viene avanti.) Eh!... aggiu voglia de dicere... aggiu voglia de fà... ma non ne ricavo niente! A poco a poco se ne stanno jenne tutte quante... E si la voce se sparge n’atu pucurillo, rimanimme dinto a st’albergo io, Carluccio e lo guardaporta!.. Nisciuno ce crede a li spirete... tutte quante diceno che so’ scemità... ma pò tutte se mettono paura! Sulamente a stu maestro de scherma a numero 9 nun le passa manco pe la capa: ogne sera fa lezione fino a li ddiece, pò se va a cuccà tranquillamente e dorme fino all’otto de la matina! (Campanello interno.)

CARLUCCIO (salendo dal piano inferiore): Eccomi.. eccomi! Mannaggia ll’arma de mammeta!.. (Reca due bottiglie d’acqua.)

ANDREA: Chi è?

CARLUCCIO: E nun lo ssapite?... D. Rocco, lo maestro de scherma! Cu sti ddoje butteglie d’acqua so’ sette che se n’ha bevuto! Starrà faceno le granavottole ncuorpo!

ANDREA: Carlù, agge pacienza, tiènece nu poco de maniera... si no ccà lo padrone pò chiudere aderittura! (Campanello interno.)

CARLUCCIO: Eccomi, eccomi! Mall’arma de mammeta! (Via salendo la scala.)