IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
CONCETTA: Neh, guè Felì... (Vedendo Alessio.) Uh! chi è?
FELICE: (A l’arma de mammeta).
FELICE: è n’amica de la padrona di casa. (Lazzi del prurito nei reni.)
ALESSIO: Dunche ricordete buono, e penza che la nostra felicità dipende dal tuo matr...
FELICE (grida): Eh!... va buono.
ALESSIO: Statte allegramente che la figlio... (Felice grida c.s.) E doppe spus...
FELICE (grida): Va buone, quante vote s’ha da parlà... (Spinge Alessio fuori che va via.) (Puozze passà no guaio padre e buono!)
CONCETTA: Chi è chillo mausoleo?
FELICE: Na conoscenza mia.
CONCETTA: E che voleva?
FELICE: Niente, n’affare di famiglia. (Non voglia maje lo Cielo e chesta sapesse che io aggio da j a lo Borgo 5. Antonio Abate.)
CONCETTA: Ma che saccio, te veco tutto mbrugliato.
CONCETTA: Uh! E che te siente?
FELICE: Me sento no dolore dinta all’uosso pezzillo che me corrisponde nfronte.
CONCETTA: Che cancaro staje dicenno!
FELICE: Voleva dì che me fa male la capa.
FELICE: Concettè, non t’arresecà de venì spisso ccà ncoppa, mo non è l’affare de primme, mò frateto è benuto da fà lo soldato.
CONCETTA: Chillo è ghiuto co n’amico sujo, e io aggio profittato pe venire a dicere che haje da venì co’ mmico.
CONCETTA: Fino a dinto a lo buvero de 5. Antuono.
FELICE: (E io llà aggio da i). E che avimmo da ~ a fa?
CONCETTA: M’haje d’accompagnà, aggio daj a consignà no cappiello, llà è quase fore Napole, nisciuno nce po’ vedé, t’aggio da parlà de tante cose. Aspetteme, io vaco a fa preparà la discepola co lo scatolo e torno. (Via.)
FELICE: Aspetta, e non nce può j dimane?
CONCETTA: No, nce aggio da j mò, chella ha d’ascì a la passiata ncarrozza ogge.
FELICE: E io comme vengo, io m’aggio da fà li lezione.
CONCETTA: E ba, và te le fà subeto subeto, trase dinta a lo stanzino.
FELICE: Ma...
CONCETTA: Và và, vì che nce vò pe te fà movere. (Lo spinge.)
FELICE: E io comme la combino, comme la combino? (Via.)
CONCETTA: Sento rummore, chi è?
TIMOTEO: Doppo na ventina de juorne, eccome cczà n’auta vota, trascurando i doveri di medico condotto pe sta benedetta D.a Ersilia, la quale mi attira comme a na calamita, io voleva bene a sta vedova, e me l’avarrìa spusata, ma li denare de D. Angela Rosa me l’hanno fatto mettere a lo pizzo, ed eccomi marito e possessore de chillo vasciello a tre ponte e mmiezo. Basta, solde non ne mancano e posso corteggiare sta vedova. Tanto cchiù che mò facimmo spusà Giuseppina, la figliastra mia, co nepoteme Felice, e accossì me levo chist’aute pulece da cuollo.