SCENA SECONDA

Giuseppina e detto.

GIUSEPPINA (con precauzione): Guè Federì?...

FEDERICO: Giuseppina mia.

GIUSEPPINA: Staje sulo?

FEDERICO: Sulo.

GIUSEPPINA: E accussì, che me dice?

FEDERICO: E che te voglio dicere, la sorte nce vò nfelice a tutte e duje.

GIUSEPPINA: Comme t’avvilisce priesto, tu saje che te voglio bene.

FEDERICO: Me vuò bene, è lo vero; ma che speranza è la nostra? Primme de tutto t’obbligheranno a sposà sto cancaro de D. Felice, che è asciuto comme miercorì mmiezo a la semmana, e po’ ammesso anche che non nce stesse tutto cheste, te pare, mammeta te darria pe mogliera a me?

GIUSEPPINA: E che fa, sino buono giovene, tu tiene talento, e te può fà strada; circa a Don Felice po’, chesto me l’aggio da vedè io.