SCENA PRIMA

Antimo, e Carmela.

ANTIMO (uscendo dalla prima porta del corridoio e scende le scale): D. Ersì, restiamo intesi, chiunque mi andasse trovando, io sto nel caffè a leggere il giornale.

CARMELA (dal casotto): Caro D. Antimo.

ANTIMO: Sei tu, cuore di selce.

CARMELA: Lassateme stà pagliè, che stasera tengo na brutta cimma de scerocco.

ANTIMO: Che t’è succieso?

CARMELA: E che m’ha da succedere, tutte so’ buone a comannà dinta a sto palazzo, ma quanno se tratta de pagà chella miseria de mesata, a ognuno le vene lo rango dinta a li mmane.

ANTIMO: A me non puoi dirlo, perché ieri so’ venuto ad abità ccà, e per te l’ho fatto, pe te stà vicino, pe consolarme guandanno sta bella faccella toja. (Si ode il cane che abbaia nella rimessa.)

CARMELA: Mò accomminciate n’auta vota.

ANTIMO: Ma io te lo diciarraggio sempe, non essere na gatta forestena co me. (Cane c.s.) Tu spusannete a me diventeresti la moglie di un paglietta.

CARMELA: Cioè na pagliettessa?

ANTIMO: Vì comme lo ssaje. Dunque posso sperare che il tuo cuonicino si muove a compassione di me. Carmela bella Carmela cara, Carmela mia. (Cane c.s.) Puozze passà no guaio! E de chi è sto cane?

CARMELA: è de lo si Filippo lo chianchiere.

ANTIMO: E che fa llà dinte?

CARMELA: Siccome è no cane de presa, che mozzeca senza compassione, accossì lo patrone m’ha pregato de tenercelo dinta a la rimessa; ma io me metto paura.

ANTIMO: Pecché?

CARMELA: Chella porta sta tieneme ca te tengo, lo cane tene forza indiavolata, e si arriva ad ascì me mangia no porpone.

ANTIMO (intimorito): E me faje parlà co te, chille li gamme meje ne fa doje freselline. Dunche te diceva (cane c.s.) Non è cosa, po’ ne parlammo cchiù tarde, chillo cancaro de cane me fa mettere paura... no muorzo de cane nce mancarria. Addio Carmeluccia mia. (Cane c.s.) Passa llà, passa llà, puozze passà no guaio. (Via.)

CARMELA: è ghiuto mpazzia lo paglietta. (Cane c.s.) Passa llà, accoccia llà, nce mancava pure lo cane.