SCENA SECONDA

D. Nicolino, e detti.

NICOLINO: (La vi accà! Oh! chesta mò ha perduta la capo!).

ROSINA: (Io nce l’aggio da appresentà chiano chiano). Maestro, ve saluto.

NICOLINO: Buongiorno, Rosina.

ROSINA: Maestro, io v’avarria da dicere na cosa...

NICOLINO: (La vi, mò se ne vene!). Parlate.

ROSINA: Maestro, vuje m’avite da ajutà!

NICOLINO: Ajutare! Ed in che cosa?

ROSINA: Si vuje ve negate a chello che ve cerco, io me ne moro.

NICOLINO: (è pazza! è pazza). Morire? Come!

ROSINA: Si sacciate, che io ardo, abbrucio d’ammore pe uno che pure me vò bene...

NICOLINO: Fermati qua, figlia mia... già che ci siamo incontrati, io ti debbo parlare francamente e da vero galantuomo qual sono. Io sò che cosa significa amare saccio che non se pò scordà,,. sì... ma chisto che tu vuò bene scordatillo, lievatillo da capo.

ROSINA: E perché?

NICOLINO: Pecché non pò essere.

ROSINA: Comme non pò essere?

NICOLINO: E ma... no...

ROSINA: Non pò essere? Chi ve l’ha ditto? Pecché non pò essere?

NICOLINO: Rosiné, io so’ nzurato, figlia mia.

ROSINA: E che me ne preme de vuje? (I nascosti ridono.)

NICOLINO: Comme! Tu non vuò fà l’ammore co mme?

ROSINA: Io? Co buje! Maestro, vuje state mbriaco?

NICOLINO: No?... Comme! Tu m’haje mannata na lettera pe Pulicenella “Mio caro angioletto”.

ROSINA: Uh! Chillo l’ha dato a vuje? Ah, ah, ah. (Ride: tutti si fanno avanti ridendo.)

GIULIETTA: Maestro!... Ah, ah, ah...

EDUARDO: Comme! Vuje! ah, ah...

ROSINA: E ve crediveve ah, ah...

TUTTI: Ah, ah! (Ridono.)

NICOLINO: E redite n’autro poco. Nzomma, chesta lettera a chi jeva?

ROSINA: Io l’aveva fatta pe Feliciello.

NICOLINO: Io l’aveva ditto... Chullo ciuccione me l’ha voluto dà pe forza a me!