SCENA PRIMA

Peppeniello e Rienzo, poi Pulcinella.

PEPPENIELLO: Dunque Riè, che me dice?

RIENZO: Mò proprio aggio consignata la lettera a D. Anastasia.

PEPPENIELLO: Io te la dette ajersera...

RIENZO: Ajersera non potette trovà no momento opportuno pe darincella...

PEPPENIELLO: Basta, nce l’haje data; e che t’ha ditto?

RIENZO: Niente perché io subeto me ne so’ ghiuto.

PEPPENIELLO: Va buono, te ringrazio. (Rienzo via.) Mò stongo cchiù de buono umore. Me parene mill’anne che D. Anastasia me dice: Peppeniello mio, io ho scherzato, non te voglio. Vuje vedite io povero giovene che aggio passato. (Entra Pulcinella.)

PULCINELLA: D. Peppeniè, avite visto a D. Felice?

PEPPENIELLO: No.

PULCINELLA: D. Peppeniè, è lo vero che D. Anastasia se vommechea co vuje?

PEPPENIELLO: Chi ve l’ha detto? Non è vero, quello fu per vedere io come la pensava. Ieri me fece na spiegazione amorosa pe vedere io come le risponneva, e io ciuccio ciuccio me lo credette e le dicette che no; essa se pigliaie collera; ma mò l’aggio mannata na lettera co dicenno che la voglio bene e che me la voglio sposà a qualunque costo.

PULCINELLA: E comme, ve sposate a D. Anastasia?

PEPPENIELLO: Nonsignore. Vuje che dicite! Chella mò me risponne che non me vò, e accossì me trovo io da coppa... Capite, io l’aggio fatto pe tenermela amica.

PULCINELLA: Aggio capito. (Nce vornia che la vecchia mmece de dicere che non dicesse che sì!)

PEPPENIELLO: La vì lloco D. Anastasia non me voglio fa vedé... Neh faciteme sapè che ve dice. (Via.)

PULCINELLA: Lo cunto se l’ha fatto buono; abbasta che la vecchia dice che no, chisto è lo mbruoglio.