SCENA OTTAVA

Ninetta, con bottiglia di cristallo traversa la scena.

PULCINELLA: Gué, bellezza mia, addò vaje?

NINETTA: Vaco a piglià na botteglia d’acqua.

PULCINELLA: E aspetta, consolame no poco co quatte parole.

NINETTA: Io mò vaco de pressa. Ma che buò che te dico, sciascione mio, che quanto cchiù te veco, cchiù te voglio bene, simpatico, zucchero, aggraziato mio.

PULCINELLA: Ninetta mia, da che te vedette, io me sentette na botta de scoppetta in questo petto: senza dite io songo n’ommo infelice; cianciusella de sto core. (Le bacia la mano.)

FELICIELLO: (Neh gué?...).

PULCINELLA: (Scrive non te ne incarricà). Dimme na cosa, hai parlato co la patrona?...

NINETTA: L’aggio ditto quacche cosa coppa coppa, ma non dubità che io a te me sposo...

PULCINELLA: Me parene mille anne che te so’ marito, bella rosecarella mia. (Bacia c.s.)

FELICIELLO: (Neh, gué...).

PULCINELLA: (Scrive, non te ne incaricà).

NINETTA: Lasseme j a piglià l’acqua si no chella allucca. Statte buono.

PULCINELLA: Addio, cuore di questa pancia, anima dell’anima mia. (Accompagna c.s.) Tu t’è scritto tutte cose?

FELICIELLO: E bravo! T’haje pigliato la rivincita.

PULCINELLA: Tu l’haje fatta a me, io l’aggio fatta a te.

FELICIELLO: Nzomma, tu faje l’ammore co la serva?

PULCINELLA: E se sape.

FELICIELLO: Buono, comme cammina bello l’argomento.