SCENA SESTA

Pasquale, Felice e detti.

PASQUALE: Felì dì la verità che bel disegno... vuje state n’ata vota assettato nterra?

MIMÌ: Caro D. Pasquale, come state? State bene?

PASQUALE: Eh! Non c’è male.

FELICE: Ma che fa, se va assettanno pe terra?

PASQUALE: Comme si segge non ce ne stessero. E che se cride ca è la primma vota? So’ tre vote ca lo trovo accussì, ma pecché non lo saccio.

MIMÌ: Ah! Ecco qua: io quann’ero piccerillo, mammà pe me fà stà cujeto m’assettava nterra e me faceva pazzià co li cavallucce, co li suldatielle... capite... e aggio pigliata chell’abitudine.

PASQUALE: Va bene, ma allora pazziaveve co li cavallucce, e co li suldatielle, ma mò a che pazziate?

FELICE: (Co la pupatella!).

PASQUALE: Susiteve.

MIMÌ: Eccomi qua.

TERESINA: E accussì D. Felì, avite visto lo disegno de la vasca dei pesci?

FELICE: Sicuro.

PASQUALE: Quanto me dispiace ca mugliereta sta malata, avevo proprio piacere di conoscerla.

TERESINA: E io pure.

MIMÌ: Come la signora Sciusciella sta malata?

FELICE: Quà Sciusciella. Sciosciammocca.

MIMÌ: Ah! Pardon! Dunque sta malata?

FELICE: Sicuro, soffre di dolori.

TERESINA: E pe farla piglià nu poco d’aria la portano a spasso dinto a na carruzzella a mano.

PASQUALE: Ah! Povera infelice!

TERESINA: Povera figliola!

MIMÌ: Povera disgraziata!

FELICE: (Me la stanno chiagnenno pe morta).