SCENA UNDICESIMA

Teresina e detto.

TERESINA: Pascalì pe lo pranzo c’è tiempo ancora... addò sta?

FELICE: Eh! Ato che pranzo... voi non lo sapete?

TERESINA: Ch’è succiesso?

FELICE: Donna Teresì vostro marito vi tradisce, e la prova la tengo io.

TERESINA: Comme, vuje tenite la prova ca Pascalino me tradisce?

FELICE: Sicuro. Vostro marito stasera va all’Albergo Riviera nzieme cu na femmena.

TERESINA: Che! Cu na femmena?

FELICE: Sì, isso mò ve dice che ha ricevuto nu telegramma di un suo cliente da Caserta e deve partire subito, invece stasera va all’appuntamento.

TERESINA: Comme, isso sarria capace, doppo tutto chello che l’aggio avvisato? Vuje avite ditto ca me ne date la prova?

FELICE: Stasera stessa. Io le faccio la spia, e quanno so’ sagliute tutt’e dduje sull’albergo ve vengo a piglià. Che ne dite? Accettate?

TERESINA: Ebbene, sì, accetto.

FELICE: Zitto, eccolo qua.