SCENA TERZA

Nicolino e detti, poi Ciccillo. (Marietta).

NICOLINO (vedendoli abbracciati): Ah! (Sospira.)

MIMÌ: Chi è? Ah! Ho vì lloco, o vì.

LISA: Cosa volete?

NICOLINO: Vengo per far prendere la vostra roba e farla trasportare nell’altra camera.

LISA: Fate pure.

NICOLINO (chiama): Ciccillo? Marietta? Potete entrare.

CICCILLO E MARIETTA: Eccoce ccà!

NICOLINO: Trasportate questo baule al n. 17.

LISA (a Ciccillo): Piglia pure la valigia. (I due eseguono e viano con Nicolino.)

MIMÌ: Ma pecché, cagne stanza?

LISA: Sì, pecché chesta non me piace, è occupata, n’aggio avuto n’ata cu nu balcone che guarda lo golfo.

NICOLINO: Ah! Mbè! E mò fà priesto, miettete lo cappiello e ghiammuncenne.

LISA: Aspetta, jammuncenne, io non ce pozzo venì.

MIMÌ: Nun ce può venì? E pecché?

LISA: Pecché aspetto n’amico ca stammatina è venuto da Roma, ajere me telegrafaje, e io pure pe telegrafo, le dette il mio indirizzo, capirai bene ca chillo mò vene.

MIMÌ: Ma chi è stu tale?

LISA: Nu negoziante de baccalà lo quale me dice ca me vò spusà.

MIMÌ: E tu preferisci il baccalà, cioè, il negoziante di baccalà, a me? Nun lo dà audienza, jammuncenne a divertì, quann’isso vene, le faje dicere che mamma toja steva malata, haje avuto correre addu essa e che ve vedite dimane. Ma vienetenne cu me, famme stu piacere.

LISA: Embè pe te fà contento accussì faccio.

MIMÌ: Evviva chella sciasciuncella mia. (C.s.)

NICOLINO: Ah!

MIMÌ: All’arma de mammeta! Vuje site nu guajo!

NICOLINO: E vuje abbracciate sempe.

MIMÌ: E tu te truove sempe arreto?

LISA: Che volete?

NICOLINO: La stanza è pronta.

LISA: Va bene, quanto me piglio lo cappiello e cedo il posto ai signori. (Via.)

MIMÌ: Ma chi so? Chi so?

NICOLINO: Nu certo Corella.

MIMÌ: Corella? D. Pasquale Corella?

NICOLINO: Precisamente.

MIMÌ: Che bella combinazione, facitelo trasì, voglio salutarlo.

LISA: Comme, lo cunusce?

MIMÌ: Altro che lo conosco.

NICOLINO (alla porta): Favorite, signori.