SCENA SESTA

Felice e Teresina.

FELICE (dalla prima a sinistra: guarda intorno): Donna Teresì, putite trasì, non ce sta nisciuno.

TERESINA (irritatissima): Ma dunque è vero, è proprio ccà dinto a sta cammera che il degnissimo mio signor marito viene con la sua bella?

FELICE: Proprio ccà. Io ho domandato al burò il numero della stanza del Sig. Corella e mi hanno detto il 39, e così io pe starle vicino aggio pigliato il 38, e per mezzo di questa porta di comunicazione vedimmo...

TERESINA: Aspettate, quanno vedimmo. Io non voglio vedé niente.

FELICE: Ma scusate, voi dovere ragionare, siate più calma. Voi volete sorprendere vostro marito con la sua amante?

TERESINA: Sicuro.

FELICE E avita fà allora chello ca ve dico io. Mò preparo na cosa, e quanno è lo mumento opportuno, voi uscite e li sorprendete.

TERESINA: E comme facimmo a saperlo?

FELICE: A questo ci ho pensato io. Il mezzo eccolo. (Mostra due campanelli a timbro.)

TERESINA: Duje campanielle?

FELICE: Uno lo mettimmo ccà. (Da un lato del letto.) E n’ato dall’altro lato. (Esegue.) E pò nce ne jammo dinto a la cammera nosta. Quann’uno de li duje se va a cuccà, ndelì, sona lo primmo campaniello, nuje non ce muvimmo, quanno sentimmo sunà ll’ato nuje trasimmo.

TERESINA: Benissimo. Avite fatto proprio na bella penzata. E si le campanielle non sonano?

FELICE: Soneno, soneno, non ve ne ncarricate, zitto, sento rummore, sarranno lloro.

TERESINA: L’aggia cecà l’uocchie a tutt’e duje.

FELICE: Priesto, jammuncenne. (Spingendola.) Trasite. (Viano prima a sinistra.)