SCENA SESTA

Salvatore, Eugenia e detto.

SALVATORE: Ma si ve dico ca mò non ce putite parlà.

EUGENIA: Non mporta aspetto, e si attacca aspetto pure fino a dimane.

SALVATORE: Fate come volete, accomodatevi. (Via.)

FELICE: (Che veco? La figlia di quella donna di età, chella che steva ncopp’all’albergo).

EUGENIA: Ah! Siete voi, signore, state qua?

FELICE: E non mi vedete?

EUGENIA: E bravo! Vularria sapé comme ve venette ncapo de dicere a maritemo ca io ero la vostra amante.

FELICE: Vedite comme se passeno li guaje; io jevo a dicere chesto a lo marito vuosto?

EUGENIA: A vuje che ve conosce?

FELICE: A vuje chi ve sape?

EUGENIA: Intanto pe causa vosta, mio marito ha fatto uno scandalo e se vò dividere pe mezzo de tribunale.

FELICE: Uh! Pe causa mia? Dovete dire per causa vostra, io avette chillo paliatone e mia moglie sta facendo le pratiche per la divisione.

EUGENIA: Vostra moglie?

FELICE: Già, mentre io saccio cu chi stiveve llà ncoppa.

EUGENIA: E cu chi steva?

FELICE: Con D. Pasquale Corella e vostra madre.

EUGENIA: Mia madre?

FELICE: La quale ve la purtasteve per allontanare ogni sospetto su di voi.

EUGENIA: Vuje che state accucchianno?

FELICE: Eh! Che sto accucchianno. Dico che la moglie sa tutto e pe causa vosta nce stanno muorte, ferite.

EUGENIA: Muorte? Ferite? Io non ve capisco, ma dov’è, dov’è Pasqualino? Io lo voglio vedé, ci voglio parlare.

FELICE (tragico): Oh! Basta, signora, vi prego di non profanare più il suo nome.

EUGENIA: Ma dov’è, dov’è Pasqualino mio?

FELICE: Egli è là, miratelo!

EUGENIA: Che! Muorto!

FELICE: Sì! E voi l’avete ucciso!

EUGENIA: Che! Pe causa mia, aiutatemi, è muorto Corella! (Sviene su Felice.)

FELICE: Oh! E chesto nce mancava... Signò, signò, e si esce muglierema... signò?