IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
TERESINA: Giovinò, nun me fa perdere la capa, si lo ffaje apposta, dimmello.
FRANCISCO: Ma scusate, vuje jate trovanno a uno, che non sta de casa ccà, e non è venuto maje.
TERESINA: è impossibile, perché aiere a lo juorno steva affacciato a lo balcone.
TERESINA: Lo balcone che sta proprio ncapo a lo palazzo appartene a sta casa?
TERESINA: Embè comme dice che non nce vene?
FRANCISCO: Scusate vuje avite ditto che se chiama Luigi Porro?
TERESINA: Eh.
FRANCISCO: E sto Luigi Porro non lo conoscimmo.
TERESINA: Ma allora comme và che steva fore a lo balcone?
FRANCISCO: Avisteve da piglià quacche sbaglio.
TERESINA: Tu quà sbaglio, io ccà tengo lo ritratto, chillo che steva fore a lo balcone, è chisto ccà. (Lo fà vedere.)
FRANCISCO: Ah, va bene, ma chisto ccà non se chiamma Luigi Porro, chisto è lo sposo de la signorina, si chiamma D. Errico.
TERESINA: Ah, se sposa la signorina?
FRANCISCO: Sissignore, mò so’ ghiute a lo Municipio.
TERESINA: Ah, bravo Allora lo voglio aspettare, perché l’aggio da parlà de na cosa necessaria.
FRANCISCO: Va bene. Assettateve.
TERESINA: Dunque se chiamma D. Errico?
TERESINA: E a me m’avevene ditto che se chiammava D. Luigi.
FRANCISCO: Nonsignore, D. Errico.
FRANCISCO: (Quacche antica fiamma de lo sposo, mò siente la risa). (Via.)
TERESINA: E bravo il Sig. Luigi Porro, pecchesto da no mese non s’è fatto cchiù vedé. Vì che belli galantuommene che stanno ncoppa a la terra. Comm’era facile a fà promesse, giuramenti, e io comme a na stupita l’aggio creduto, s’ha cagnato pure lo nomme... e bravo! ... già chillo facette murì la mugliera de subeto tanto de la collera che le deva. Ih ch’assassino. Primma de tutto aggio da mannà na lettera anonima a lo padre de la sposa, e l’aggio da dì tutte cose, po’, quanno è ogge che vene D. Ciccillo lo miedeco, le dico che cacciasse li carte pecché voglio spusà lesto lesto... è no poco viecchio, e che fa, almeno so’ sicura de la riuscita; e che fa... va bene.