SCENA TERZA

Nannina, e detto.

NANNINA: Papà, buongiorno.

NICOLA: Oh, figlia mia, comme staje, staje bona?

NANNINA: Si papà, ma tu però non staje comme stive primme, da che mi so mmaritata, staje tanto de cattivo umore pare che vuò chiagnere sempe, ma pecché, pe quà ragione?

NICOLA: Ecco qua figlia mia, papà tuo ti dice la verità, avarria avuto cchiù piacere si t’avisse sposato a don Celestino.

NANNINA: E pecché?

NICOLA: Pecché?... che saccio, è no buono giovene.

NANNINA: E che Errico è cattivo forse, me vò tanto bene, e po’ tu lo ssaje, io a don Celestino me l’avarria sposato pe fà piacere a te, mò no pecché l’avesse voluto bene. Errico è distinto, gentile, veste in moda, mentre don Celestino me pareva nu scemo, no stonato, se mbrogliava a parlà, insomma non era buono a niente.

NICOLA: E pure, figlia mia, quello ti avrebbe fatto felice. Basta, non ne parliamo cchiù, mò è fatto mò. Dimme na cosa, maritete dice che è asciuto presto stamattina.

NANNINA: Si papà, tanto priesto, che non l’aggio ntiso nemmeno tu lo ssaje, io tengo lo suonno pesante.

NICOLA: E questo è male figlia mia, quanno duorme, cerca de sta lesa.

NANNINA (ridendo): Ah, ah, chesto è bello, stongo lesa, e io quanno nce so’ addormuta saccio chesto.

NICOLA: (Che innocenza). E aissera non te dicette addò jeva stammatina?

NANNINA: No, non me dicette niente.

NICOLA: Figlia mia, qualunque cosa te dice tuo marito, non lo risponnere maje, di sempe ca sì, non lo contradire in niente, e se vedisse qualche giovinotto, non lo guardà nemmeno.

NANNINA: Oh, chesto se capisce.

NICOLA: E quanno vide che sta pe se nfucà, lassalo e curre subito addò me, hai capito? Quanno duorme cerca de sta lesa. (Via a destra.)

NANNINA Io non saccio capì papà che have dall’autriere, si m’avesse spusato no brigante, manco potarria parlà de chella manera.