SCENA SESTA

Nicola e detto poi Biase.

NICOLA: Don Celestino che cos’è?

FELICE: D. Nicola mio, è succieso lo guaio... povera casa vosta.

NICOLA: Ch’è stato?

FELICE: Ho scoverto una cosa che non poteva mai immaginare. Mò che so’ venuto, aggio trovato a Nannina vostra figlia che parlava nientemeno co no giovinotto.

NICOLA: Voi che dite! E che dicevano?

FELICE: Essa diceva: mio caro D. Federico quando una donna è maritata se mette paura de qualunque cosa. Isso ha ditto: Va bene, io pe ve fà piacere faccio tutto. Essa pò l’ha ditto: jate a la casa e portatemelle mò proprio.

NICOLA: Che cosa?

FELICE: E io che ne saccio. Isso diceva: Ve lo porto stasera, essa diceva: Nonsignore me l’avite da portà mò, e facite ampressa, pecché si vene mariteme nun putimmo fà niente cchiù.

NICOLA: Possibile!

FELICE: Possibilissimo! Capirete, che si l’appura lo marito, chella è sparata primma de stasera.

NICOLA: E se capisce: Uh! Mamma mia, e chella li lume l’ha perdute. Comme l’ha chiammato D. Federico?

FELICE: Già, caro D. Federico.

NICOLA: Uh! E chillo è amico stretto de lo marito, l’ha potuto mannà pur’isso, pe vedé la mogliera come la penzava.

FELICE: E se capisce.

NICOLA: Ah, giovine disgraziata.

FELICE: Chillo mò lo marito saparrà tutte cose e se sta zitto.

NICOLA: Già come facette coll’auta mugliera.

BIASE: Signò, è benuto n’ommo, e ha portato sto cascettino, diretto al Signor Bernard. Ha ditto, consegnatelo proprio mmano a isso. Ch’aggio da fà?

NICOLA: Miettelo llà ncoppa. (Indica il tavolino.)

BIASE: M’ha consegnato pure la chiavetella, chesta è essa. (La mette sul cassettino e via.)

NICOLA: No cascettino co la chiavetella?... e che nce starrà dinto?

FELICE: Volimmo vedé?

NICOLA: Vedimmo. Mentre io arapro, vuje facite la spia si vene isso. (Felice va in fondo. Nicola apre il cassettino, prende una pistola, poi la rimette subito al suo posto, chiude di nuovo e cade sopra di una sedia quasi svenuto.)

FELICE: D. Nicò... D. Nicò... ch’è stato? Avite visto che nce sta llà dinto? (Nicola gli fa segno di andare a vedere. Felice va a vedere e fa lo stesso di Nicola.)

NICOLA: Povera casa mia! Jammo a chiamà li carabiniere... andiamo alla Questura.

FELICE: E che nce jammo a fà a la Questura? Non lo ssapite chille comme ve risponnene: Non possiamo far niente, fatevi prima sparare e poi venite qua.

NICOLA: E come si fa, come si ripara a questo guaio. (Passeggia infuriato Felice lo segue.)