IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
FELICE: Già... i guanti... eccole ccà! (Li dà.)
CRESCENZO: Ma che d’è... staje affuscato?... ch’haje!
FELICE: No... e... ve site scetato?
CRESCENZO: Me so’ scetato... caspita, io me so’ susuto quanno te sì susuto tu.
GIULIO: Ma vuje overo che saccio comme ve veco.
CONCETTA Nun sta comme a lo ssoleto.
CRESCENZO: Io l’aggio ditto...
FELICE: Che cosa curiosa... a me me pare che vuje zi Crescè nun state comme a lo solito... già state russo... l’uocchie se chiudano.
CRESCENZO (spalancando gli occhi): L’uocchie se chiudano.
FELICE: Sicuro... vuje tenite suonno... jateve a cuccà.
FELICE (subito): No, nun ve forzo... ma io dico che quanno uno nun è avvezzato a la vita de Napole... (Io sta jurnata moro!).
GIULIO: Certo quacche cosa v’è succieso D. Felì.
FELICE: No, che succedere... sto nu poco sudato... pe truvà chilli guante aggio curruto... 18 nisciuno li teneva.
FELICE: Sicuro 8... e quanto ho detto?... Ho sbagliato... e po’ la gioia de vedé a zi Crescenzo... Parliamo d’altro...
CONCETTA (a Crescenzo): Quanto ve vò bene.
CRESCENZO: Nun me n’ha voluto maje tanto.
FELICE: Oh!
CRESCENZO: Chisto è stato nu cattivo soggetto.
CONCETTA: Ma po’ se capisce che pigliando moglie...
CRESCENZO: E chi vulite che l’affida na figlia... parola d’onore è tanto capace de fà lo marito chisto, quanto io l’imperatore della Cina.
FELICE: Zio, voi offendete le mie qualità fisiche e morali.
FELICE: Ah, ah, ma comme sempe pazzariello... nun lo date retta, me lo fa sempe... mannaggia l’arma del diavolo... chillo mò guardate comme sape fingere... e spassate sà vicchiariè... spassate.. abballammo là ra la ra. (Ballando e cantando fra sé.) Facite venì lo carrettone.
CONCETTA (imitandolo): La ra la ra.
FELICE: Ma a proposito, vuje sapite ch’è tarde... mò vene lo vice sindaco e nun cunvene de farlo aspettà, doppo che s’è fatto na mbroglia. (Fragandosi le mani.) Jammo ohp là ohp là.
FELICE (la spinge a d.): Jate mò, nun perdite cchiù tiempo... vuje v’avita mettere ancora li guante e p’appuntà 12 bottoni nce vò tiempo... jate, iate.
FELICE (sempre spingendoli): E nun perdite tiempo... jate, jate.
FELICE: Tutto quello che volete, ma nun perdite tiempo... fate priesto... jate... jate... (Io mò crepo, io mò crepo). (I 2 viano prima a d.). Zì Crescè trasite ccà... putite durmì nu poco. (Ripigliandosi.) Si no ve fumate nu sigàrio.
CRESCENZO: Ma no... saje che aggio vennuto a la casa.
FELICE (indjfferente): Me fa piacere.
CRESCENZO: Se l’accatta D. Giulio.
CRESCENZO: Si... ma pare che te dispiace?
FELICE: No... io aggio ditto che me fa piacere. (Chesto sulo nce mancava.)
CRESCENZO: A proposito, che te ne faje doppo a lo spusalizio.
FELICE: Niente!... proprio niente.
CRESCENZO Embè aggio pensato de purtarte cu me a Montecorvino... siccome nce và quacche arrepiezzo a cchiù de na cammera, me faje lo piacere de farlo tu.
CRESCENZO: Si, tu... capisco che pe nu pittore comme a te, sarebbe n’offesa, ma simme fra de nuje... va buono, stasera nce ne jammo.
FELICE: Ma...
CRESCENZO: Ma che.. se io me sacrifico pe te... tu quacche sacrifizio l’haje da fà... sino ognuno se tira li ponte. (Via seconda a sinistra.)