SCENA OTTAVA

Felice e detti.

FELICE (scende dalle scale): Che vuò truvà cappiello! Io ll’aggiu rimasto ncoppa a lo parapetto... sarrà juto abbascio! E come faccio?... Chi la sente a D.ª Cuncettina? (Entra a sinistra.)

CONCETTA: Addò sta lo cappiello?

FELICE: D.ª Cuncetti, nun l’aggio truvato! Sarrà juto abbascio!

CONCETTA: È ghiuto abbascio? E io comme me ne vaco? Ah! Mannaggia lo mumento che so’ venuta cu vvuje!

MICHELE (nella sua stanza): Intanto muglierema se pò credere che io mò sto ccà? Niente affatto! Va trova che starrà penzanno de me! Ma puverella... bisogna compatìrla! Chella certamente lo ffa pecchè me vò bene... E io me nfoco, la faccio cancheriate, le dico vattenne, lasseme stà... pecché lo saccio che nun se move da dinto a la casa manco si la sparano!... Si la credesse capace de fà quacche ccosa, nun nce lo diciarria... pecché, francamente, io pure la voglio bene! Nun voglia mai lo cielo e me tradisse cu quaccheduno! Accedarria primmma a isso e pò a essa! (Sbadiglia.) Aha!... (Si mette sul lettino in fondo.) Mò succede che m’addormo e addio perizia! (Altro sbadiglio.) Aha!...

FELICE (implorante): D.ª Cuncettì...

CONCETTA (nervosa): Lassateme sta! Mò si sapisseve comme stongo! Io l’aveva capì che venenno cu vvuje chesto me sarria succieso! Vuje facite nu sacco de ciucciarie! Dinta a la carrozza avite fatto nu lamiento ddoie ore pecché ve faceva male male la gamba pe lo muorzo che v’ha dato lo cane; nun putite fumà che v’avota la capa e lo stommaco; me purtate ncoppa a st’albergo e consigliate a D. Antonio cu li nnepote de venì a ccà! Ve purtate lo cappiello mio e lo rimmanite ncoppa a la terrazza... Ma vuje che ommo site? Che animale site?...

FELICE (avvilito): Sì, avite ragione! Insultatemi... diceteme nu cuofene de maleparole... Tutto nce ha avuto colpa chillu diavolo de sigaro... Ma che volete, è stato il desiderio de me fà na bella fumata!

CONCETTA: Basta, jammuncenne mò... nun perdimmo cchiù tiempo!

FELICE: E ve ne jate senza cappiello?

CONCETTA: Embè, ch’aggia fà? Nun ’mporta... mò è sera...

FELICE: Aspettate... e chiste che dicene che nun cenammo cchiù?

CONCETTA: Truvammo na scusa qualunque... regalate na cosa a lo cameriere!... Vedite, stesse D. Antonio fore a la porta?

FELICE: Ah, già... dicite buono... (Schiude la porta e guarda.)

MICHELE (sul lettino nella camera a destra, sbadiglio): Aha... nun ne pozzo proprio cchiù! (Spegne il lume e si addormenta.)