SCENA DODICESIMA

Nannina, Menechella, Felice e detti.

NANNINA (che ha udite le ultime parole) Ah! Povera a me, ma che v’aggio fatto che me trattate accussì?...

MINISTRO: Tu si na peccerella senza capa come a tua madre!

CARMELA: Ti prego di non insultarmi!...

NANNINA: Pe me non nce sta cchiù niente ncoppa a sta terra, me voglio j a chiudere dinto a nu convento, voglio nurì!... (Siede.)

MINISTRO (gridando, spavento di Felice): Sarebbe assai meglio andarti a chiudere in convento che dare dispiaceri a tuo padre.

NANNINA: Ma che aggio fatto io, che v’aggio fatto?

MENECHELLA: Ma se po’ sapé che è succieso?

MINISTRO: Oh! Benedetto Dio!... Ma vi prego lasciarmi in pace, perché in questo momento tengo tante cose per la testa!

MENECHELLA (al marito): Ma che sarrà?

FELICE: (Affari domestici... sarrà meglio che squagliammo!).

NANNINA: Ah! Mamma mia, mamma mia! Mò moro! Comme me sento male!

CARMELA: Nannì... Nannì... ma che me la vuò fà murì a sta criatura!...

NANNINA: Me sento na cosa ccà. (Indica la gola.) Me sento soffocà!...

MENECHELLA (che col marito era per uscire, si volta e torna presso la sedia dove Nannina è assistita dalla madre): Meh, Meh, angiulillo de mamma soja, fatte coraggio, papà fa accussì, ma po’ te vò bene.