SCENA NONA

Luisella, Celestino e detti, poi Carluccio.

LUISELLA (internamente, dal piano sottostante): Saglite, D. Celestì.. saglite! (Fuori.)

CELESTINO (che la segue): Luisella mia cara cara...

FELICE (che spiava ancora dietro la porta del salottino, a parte): (Che?!... Luisella e don Celestino!...). (Chiude rapidamente la porta.)

CONCETTA: Ch’è stato?

FELICE: È sagliuta la cammerera mia co lo nepote de lo marito vuosto!...

CONCETTA: Che?!... Celestino?... Vuje che dicite?

LUISELLA (nel corridoio a Celestino): Mò cenammo tanto bello... mangiammo cujeto cujeto... pò turnammo a la casa e dicimmo che avimmo fatto tarde e avimmo truvato lo cullegio chiuso. Comme ve pare?

CELESTINO (entusiasta) Brava! Brava chella Luisella mia!... Ce vulimmo spassà!

CONCETTA: Assassino... mbruglione!...

CELESTINO: Simpaticona! ... Sciasciona! ... Zuccariello mio!...

FELICE: E diceva che ll’amice suoje erano li libre!...

CONCETTA: D. Felì... io me metto paura de stà ccà... aspetto llà dinto... (Indica la porta a sinistra.) Quanno se ne so’ ghiute da lloco ffora, me chiammate. (Via a sinistra.)

FELICE: Va bene. (Spia dalla serratura.)

LUISELLA: Chiammammo nu cammariere...

CELESTINO (chiama): Cameriere?... Cameriere?...

FELICE: E brava Luisella!... Se va sciglienno li pullastielle!... Dimame la voglio fa fà marenna!...

CELESTINO: Cameriere?...

CARLUCCIO (dalla scala, dal basso): Comandi?

LUISELLA: (piano a Celestino): (Parlate vuje!).

CELESTINO (piano a Luisella): (E ch’aggia dicere?...).

FELICE (preoccupato): Chiste s’avessena mpezzà ccà dinto?... Ccà nun c’è chiave... me vede Luisella e stateve bene! Mò aspetto pure io llà! (Entra anche lui a sinistra.)

LUISELLA: Cameriere, questo è mio fratello che ho ritirato questa sera dal collegio. Vogliamo cenare.

CELESTINO: Sicuro!... Voglio cenare con la sorella!

CARLUCCIO: Benissimo! Vì metterò nella stanzetta numero 5. Venite con me.

LUISELLA: Andiamo... fratello mio!

CELESTINO: Andiamo... sorella mia! (Escono tutti e due seguendo Carluccio su per la scala.)