IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
ATTO PRIMO
SCENA PRIMA Concetta e Pupella, poi Luisella. Concetta lavora la calza; Pupella č vicina alla finestra; entrambe sono sedute.
I link alle concordanze si evidenziano comunque al passaggio
SCENA PRIMA
Concetta e Pupella, poi Luisella. Concetta lavora la calza; Pupella è vicina alla finestra; entrambe sono sedute.
PUPELLA: Mammà, songo li 4 e meza, e papà nun se vede ancora; mo vide che facimmo lo stesso fatto d’ajere. A n’ore de notte nce magnajeme nu ventre de puorco 5 perzune. (Gridando:) I tengo famma, i tengo famma!
CONCETTA (alzandosi): Haje ragione, figlia mia, haje ragione, tu sparte lo core, ma che aggia fà io puverella? Mannaggia quanno maje me jette a spusà a chillu disperatone! Me fosse rotte li gamme quanno jette ncoppa a lo Municipio! Da che m’aggio spusato a isso, sto passanno nu sacco de guaje! Mò nce ha cumbinato chist’auto piattino. Steveme sule a casa, e chellu poco che tenevemo, nce lo sparteveme a magnà nuje sule, puteveme sfucà na chiacchiera senza che nisciuno nce senteva; a maggio truvaje sti 2 cammere e se vulette aunì cu chill’auto disperatone de D. Felice, ma stasera la faccio feruta, vì!
PUPELLA: Oh! Po’ sà che ve dico, mammà, avisate a mugliera de D. Felice che nun me ncuitasse.
PUPELLA: Comme chi mugliera? D.a Luisella!
CONCETTA: Ah! già, mugliera! (Chella è la nnammurata). Pecché, che è stato?
PUPELLA: Ajssera io steva affacciata a la fenesta, aspettanno quanno passava chillo giuvinotto che va pazzo pe me, tutto nzieme venette essa e se mettette alluccà dicenno che nun steva bene a fà ammore da coppa la fenesta.
CONCETTA: Uh! Teh teh ha fatto scrupolo D.a Luisella! E chello che fa essa sta bene? E tu pò sì figlia a me, haje da dà cunto sula a me dinto a sta casa e a nisciuno chiù! (Luisella esce.) Vuje vedite addò nce steva aspettato stu guajo!
LUISELLA: Mò avite ditto buono D.a Concè, overo che avimmo passato lo guajo, e me parene mill’anne che passene sti 4 mise... Ne voglio fà miglia! Mamma mia, e che gente disperate e superbe!
CONCETTA: Nuje si vulimmo essere superbe, nun avimma da cunto a nisciuno! Pe riguardo po’ a disperazione, vuje nun putite parlà...
PUPELLA: Sempe cchiù disperate de nuje state!
LUISELLA: Eh, avite ragione, che v’aggia dicere, me l’aggia piglià sulamente cu chillu sfurcato che m’ha miso a chesto, ma va trova quà juorno de chisto, fernesce malamente dinto a sta casa!
CONCETTA: Guè! D.a Luisè, tu senza che faje la guappa, fernesce malamente, e nun fernesce malamente, nuje nun simme fatte gente de mieze a la strata, che ghiammo truvanno de fà chiasso... Zitto zitto, te piglie la robicella toja e te ne vaje, sà!
LUISELLA: Me piglio la rrubicella e me ne vaco? D.a Concè, io credo che staje cu li pazzielle ncapo! Ve ne jate vuje ma no nuje.
PUPELLA: Ve ne jate vuje, pecché papà facette l’affitto, isso firmaje.
LUISELLA: Neh? E lo patrone de casa pecché nce la dette? Pecché Feliciello facette lo garante... chillo piezzo de stupito! Intanto mò lo patrone de casa avanza 5 mesate, voglio vedé chi li caccia sti denari, ha da pensà primme a me spignà li pigne, e specialmente l’aniello cu li turchine che me lo mpignaje pe ve fà magnà.
CONCETTA: E io lo ssapevo che a chesto avevama ascì! L’aniello cu li turchine!... Comme avesse ditto stu grand’oggetto, n’anelluccio tutto strutto, nun saccio quanto pesaje, chillu povero mpignatore pe me da 5 lire, nce vulette la mano de lo Cielo!
LUISELLA: E che vulite? Io chill’oggetto teneva, a la fine na sarta era, e chellu ppoco d’oro me lo facevo cu la fatica... Si avesse fatto ammore io pure cu nu signurino... (Marcato.)
PUPELLA: Mammà, l’have cu mico?
CONCETTA: (Ma tiene mente! Chesta comme vò ncuità la gente!). Guè, D.a Luisè, si figliema fa ammore cu nu signurino, nce fa ammore onestamente, e tu nun sì degna de parlà de sta guagliona, sa, pecché li fatte tuoje se sanno.
LUISELLA: D.a Concè, i fatte miei so’ chiari, e parla comme haje da parlà, si nò te rompo la capa!
CONCETTA: A me me rumpe la capa? Vattenne, zantraglia!
LUISELLA: Uh! Vì chi parla! Ma che, te sì scurdata che fratete è solachianiello?
PUPELLA: Uh! zi-zio è solachianiello, neh, mammà?
CONCETTA: Nun la dà udienza, figlia mia, chillo fa li scarpe de raso a tutte li ballerinole de S. Carlo, e quanno s’annommena Masto Mmalora, nun se passa cchiù nnanze.
LUISELLA: Oh, chesto è overo, chillo fa buon’affare cu li ballerine...
CONCETTA: Luisè, statte zitta, si no ogge te tiro tutte li capille da capa.
LUISELLA: Tu a chi tire i capille, a chi? (Gridando.)
CONCETTA: A te, a te! (Gridando.)
PUPELLA: A te! Sì, a te! (Gridando. Di dentro suona il campanello.)
CONCETTA: Io chiacchiere nun ne faccio, me piace de fa i fatte!
LUISELLA: E io pure, D.a Concè, perciò, pe tutto dimane, vedimmo da nce spartere, si no succede brutto! (Pausa. Di dentro suona di nuovo il campanello.)
PUPELLA: Mammà, la porta! (Tutte e tre seggono.) (Chisto po’ essere che è D. Felice, non le voglio arapì). (Alla madre.)
CONCETTA: (E io manco vogl’j a arapì, pecché si è chill’assassino de maritemo, comme stongo mò, lle chiavo nu muorzo appena lo veco!). (Altro squillo di campanello di dentro.)
LUISELLA: La porta nun la sentite?
CONCETTA: E ched’è, nce stamme sole nuje dinta a la casa?
LUISELLA: Io nun voglio arapì, pecché po’ essere che è lo marito vuosto e io nun songo la serva soja!
PUPELLA: Ma po’ essere pure D. Felice?
LUISELLA: E po’ essere pure patete, chi ne sape niente?
CONCETTA: Và arape tu, Pupè, nun mporta và arape tu.
PUPELLA: (Haje ragione che po’ essere papà, si no mò me muveva!). (Via pel fondo, poi torna.)
CONCETTA: (Sì è Pascale, aggia fà revotà la casa!).
LUISELLA: (Sì è Felice, l’aggia fà fernuta!).
PUPELLA (uscendo): D. Giacchino, lo patrone de casa.
LUISELLA: Oh!
CONCETTA: è arrivato a tiempo!