IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
ATTO TERZO
SCENA OTTAVA Detti e Bettina che entra, e resta ad osservare tutti tenendosi in disparte.
I link alle concordanze si evidenziano comunque al passaggio
Detti e Bettina che entra, e resta ad osservare tutti tenendosi in disparte.
FELICE: Ma chi te vò vedé cchiù!... Chi te vò vedé... Pe causa soja aggio passato nu sacco de guaje!
LUISELLA: Pe causa mia haje passate nu sacco de guaje?... Tu sì stato sempe nu disperatone!
FELICE: Sò stato sempe nu disperatone? Neh, tu siente, Pascà?
PASQUALE: Eh! dimmella a me!... Chesto nun lo può dicere, pecché cunuscenno a te è ghiuto pezzenno.
LUISELLA: Sciù, pe la faccia toja!...
PASQUALE: Pe la faccia de mammeta!
LUISELLA: E ghiuto pezzente pe me?!... Chillo m’ha mpignato tutte cose.
FELICE: E n’auta vota mò cu sti pigne!... E n’auta vote cu sti pigne!... Ma chi me li dà 47 lire pe nun la sentere cchiù?
BETTINA (avanzandosi): Te le dò io!...
LUISELLA: Oh!... vuje State ccà?
FELICE (in mezzo alle 2 donne): Ma che bulimmo fà mò ccà?... che bulimmo fà?!
LUISELLA: E allora è n’auta cosa, allora nce penzate vuje... A vuje nun ve songo niente 47 lire?...
BETTINA: Se capisce, ca nun me songo niente, pecché io me l’abbusco co la fatica!... E sa che te dico, Luisè!... Vattenne co lo buono, pecché si nò te ne vaje malamente!
LUISELLA: Me ne vaco malamente!... Me ne vaco malamente!...
FELICE: Ca chella tene lo curtellino dinto a la sacca...
LUISELLA: Vattenne, che tu nun haje fatto mai niente; e si vuò fà buono, và fa lo lietto a la signora, ca tu, nfaccia a me nun può dicere: vattenne!
PASQUALE: Chella è mugliera! E comme a mugliera lo pò dì! (Mentre gestisce lascia cadere per terra, disotto al pastrano una posata d’argento.)
FELICE: (Pascà, ca nuje jammo ngalera! Pascà, ca nuje jammo ngalera).
PASQUALE (raccoglie in fretta la posata, e la ripone su una mensola): (Ma che! Io a tavola era distratto, e me l’aggio misa dinta a la sacca).
LUISELLA: Ma la mugliera se l’ha dà piglià co lo marito ca va facenno tanta mbroglie, e accussì me ngannate a me puverella!
BETTINA: No, me l’aggia piglià sempe cu tico, che te mettiste cu n’ommo nzurato!
CONCETTA: E se capisce!... Na bona figliola chesto nun lo fà!
LUISELLA: Guè, trabaculo scassato, statte zitta, pecché io piglio a schiaffe, primma a te e po’ all’aute!...
CONCETTA (gridando): Lo dice pecché staje ccà ncoppa!
LUISELLA (gridando): No, ve lo dico pure abbascio!
FELICE (gridando): Statte zitta!...
PASQUALE (gridando): Sì stata sempe na zantraglia!...
LUISELLA (gridando): A me zantraglia?! (Si azzuffano urlando e strepitando e nella zuffa Felice prende uno dei suoi bqffetti finti.)