IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
ATTO TERZO
SCENA NONA Gaetano, Gemma, Luigino, e Pupella, dal giardino; Vicienzo, e Giacchino dal fondo indi Ottavio, Eugenio e detti.
I link alle concordanze si evidenziano comunque al passaggio
Gaetano, Gemma, Luigino, e Pupella, dal giardino; Vicienzo, e Giacchino dal fondo indi Ottavio, Eugenio e detti.
GAETANO: Guè, oh!... E che stammo abbascio a lo Lavenaro! (Accorrono tutti gli altri e riescono a separarli.)
GIOACCHINO: Ch’è stato?... Se sentono li strille da vascio?
GAETANO (guarda Felice che ha un baffo solo): Che!... Principe!... Se n’è caduta ma mignatta!...
FELICE (sorpreso, avvicina la mano alle labbra, e gira intorno a D. Gaetano).
GAETANO: Mò lo va truvanno da dereto a me!
FELICE (a Gaetano): Forse, chi sa... qualche mossa di sangue!...
GAETANO: Eh!... Ma ch’è stato, principe, marchese.
LUISELLA: Vuje quà principe?... Quà marchese?... Signò, vuje che dicite! V’hanno mbrugliato!... Chiste sò quatte disperatune!... Uno è D. Felice Sciosciammocca, lo scrivano, e l’auto è D. Pascale lo salassatore!
LUISELLA: Nu certo D. Eugenio, che fa l’ammore co la figlia vosta, l’ha fatte travestì de chella manera pe ve puté mpapucchià, e io me sò finta principessa, pe scummiglià tutte cose! E vuje ve l’avite creduto?... Mamma mò, e che piezzo de battilocchio site, neh! (A D.a Concetta, Felice, Pasquale e Pupella.) Chillo era lo Marchese! Chillo era lo principe!... Chella era la cuntessa!... Chell’auta la cuntessina!... Sti quatte muorte de famma! ... E mò sa che ve dico!... Dimmane purtateme li 47 lire, pecché si no addò ve trovo, ve mengo ma vricciata mmocca, e ve faccio perdere lo sapore de lo pane. Marchese... principe... contessa!... Sciù pe li facce voste! Che puzzate essere accise! accise! (Via pel fondo a destra, mentre compariscono sulla soglia Ottavio ed Eugenio.)
GAETANO: Possibile! Ed è vero tutto questo?
GIOACCHINO: Sissignore, D. Gaetà! Vuje quà principe?!... quà marchese?!... quà cuntessa?!... Chille m’hanna dà 5 mesate pe nu quartino che l’affittaje!
GAETANO: Vuje che dicite?... Neh!... Gemma?... Lo marchesino addò stà? (Gridando.)
EUGENIO (avanzandosi con Ottavio): D. Gaetano mio, perdonatemi, ho fatto fare questa finzione, perché amavo troppo Gemma, ed ora sono pronto a sposarla col consenso di mio padre, qui presente. (Mostra Ottavio.)
GAETANO: Come! Voi, suo padre?!...
PASQUALE: Sissignore, lui è il marchese Ottavio Favetti.
GAETANO: E perché ve faciveve chiamà il signor Bebè?
OTTAVIO: Per poter venire in questa casa da incognito, parlare con Gemma, conoscere il suo carattere, e vedere se era degna di mio figlio!
GAETANO: Meno male!... Allora, sposatevi e il Cielo vi benedica!
EUGENIO: Finalmente! (Abbraccia Gemma.)
LUIGINO: Papà, benedite anche a noi!... Io amo la contessina, la contessina mi ama, e ci vogliamo sposare.
GAETANO: Quà contessina?!... Faciteme capì, chesta mò chi è?
CONCETTA: E io songo la mamma.
GAETANO: E bravo!... E tu comme te ne sì nnammurate, tutto nzieme?
PUPELLA: Tutto nzieme?!... Nuje facimmo ammore da nu mese e miezo!... Guè! oh!...
LUIGINO: Sissignore, papà, da tanto tiempo!
GAETANO: Va bene, per il piacere che ho maritata mia figlia, vi sposerete anche voi.
PUPELLA: Che bella cosa!... Che bella cosa!
LUIGINO: Bellezza mia. (L’abbraccia.)
GIOACCHINO: D. Gaetà, scusate, e a me le 5 mesate chi me le dà?
GIOACCHINO: Va bene.
GAETANO: A proposito. Vuje pecché stiveve dinto a la cammera de Bettina, e pecché diciveve nfaccia a Peppeniello: «Figlio mio! Figlio mio!»?
FELICE: Pecché a Bettina le so’ marito, e a Peppeniello le so’ padre.
BETTINA: Sissignore, eccellenza! Simme state spartute 6 anne, e mò pe sta cumbinazione nce simmo cuncentrate.
GAETANO: Bravissimo!... E Peppeniello v’è figlio?
VICIENZO: Sissignore, eccellenza, e io pe lo fà rimané dinta a sta casa, v’aggio ditto che l’era patre.
GAETANO: Mannaggio ll’arme de li mamme voste!... Vì quanta mbroglie!... E chill’assassino de lo guaglione, comme ha fatto la parte naturale!... Vicienzo m’è padre a me!... Addò sta? Addò sta?
VICIENZO: Sta dinta a chella cammera. (Mostra la prima porta a sinistra.) Se sta mettenno la sciassa.
GAETANO: Aspettate, voglio vedé si se ricorda. (Suona 3 tocchi.)