SCENA QUINTA

Giulietta e detti, poi Felice.

GIULIETTA (si fa avanti): Se n’è ghiuta?... Viva, viva, tra llà rà. (C.s.)

FELICE: Mannaggia l’arma de mammeta, che haje combinato?

GIULIETTA: V’è piaciuta la penzata c’aggio fatto?

PASQUALE: Magnifica!...

FELICE: Io vaco a vedé si trovo na vesta, na cosa qualunque. (Via.)

GIULIETTA: Dicite la verità, l’angelo l’aggio fatto buono?

PASQUALE: E comme se puteva fà meglio? E chella vecchia che s’ha creduto tutte cose.

GIULIETTA: Ma chella è proprio na pachiochia vì!

FELICE (fuori): Comme se fa, chella ha chiuso a chiave lo stipo, lo commò, tutte cose.

GIULIETTA: E allora vuol dire che resto ccà! Faciteme fà marenna, però, pecché tengo n’appetito che mò moro!

FELICE: Che marenna, e rimané ccà, vuje site pazza! Chella mò torna muglierema, ve vede... e vò sapé chi site.

GIULIETTA: Me vede? Vò sapé chi songo? E nce lo dico, che fa? Viva, viva, tra llà rà. (C.s.)

PASQUALE: Quanto site graziosa quando fate stu movimento.

FELICE: Mò vide che movimento te siente dinto a li rine!... Fammo lo piacere, scinne, và addo lo barraccaro che sta a lo puntone, accatta na mantella, nu soprabito, nu spolverino qualunque... po’ me faje sapé quant’haje spiso... va...

PASQUALE: Ah! Bellissima idea. D.^a Giulié, che volite, na mantella, o nu spolverino?

GIULIETTA: Aspettate... io aggio visto na bella pelliccia da la Rinascente, pigliateme chella.

FELICE: Vuje quà pelliccia, io mò ve metto dinto a nu sacco e ve ne manno, e chella va trovanno la pelliccia.

GIULIETTA: Basta, pigliateme chello che vulite vuje. Viva, viva, tra llà ra. (Cs.)

PASQUALE: Bella, bella, simpaticona!... Vaco e torno subito! Viva, viva, tra llà rà! (Via.)

FELICE: Vedite chill’ato farenella, nu chirurgo conosciuto. Viva, viva, tra llà rà. D.^a Giulié, aspettate, voglio vedé si pozzo aprì lo stipo, cu una de sti chiave. (Prende un mazzo di chiavi che sta sul tavolo davanti.) Mò vengo... (Nell’andare.) Vuje m’avite lassà stà, io aggia fà lo miedeco, non pozzo secondare le vostre pazzie! (Entra.)

GIULIETTA (ridendo): Ah! Ah! Io non ce pozzo penzà, chesta è stata proprio na cosa curiosa, io non me ricordo proprio niente. Me ricordo che isso steva mbriaco assaje, sì, chesto me lo ricordo, s’appiccecave cu tutte quante, a tutte quante conosceva, e le deve la mano... pò chiano chiano, bevenno, bevenno, e pazzianno, pazzianno, me so’ mbriacata pur’io. (Ride.) Ma pò comme va che me so’ trovata ccà ncoppa, chesto nun lo ssaccio, meno male che la mogliera dormeva dinto a n’ata cammera, si no facevamo na bella frittata.