SCENA DECIMA

Angiolina e detta, poi Errico, poi Clementina e Salvatore.

ANGIOLINA: Signò, m’avite rimasta sola, addò site juta?

GIULIETTA: Sono venuta a cercare mio marito.

ANGIOLINA: Uh, signò, chillo giovene che me vò spusà. D. Errico vene da chesta parte.

GIULIETTA: Isso?... Allora ti raccomando la lezione, mò nce vedimmo. (Si nasconde a sinistra in fondo, e fa capolino, Angiolina passeggia con gran sussiego, facendosi vento col ventaglio.)

ERRICO (uscendo): Oh, signorina.

ANGIOLINA: Oh, buonasera, viva, viva, tra llà rà. (Alza la gamba.)

ERRICO: Bravissima.

ANGIOLINA: Sù, via, datemi questa mano... (La prende.) Stringetela, così, forte, comme se dice assanguato!...

ERRICO: (E ched’è neh?).

ANGIOLINA: Me parene mill’anne che spusammo, non me fido aspettà cchiù, quanno na figliola se fa de na certa età, lo marito è necessario come lo ppane, e io lo voglio, lo voglio, lo voglio!

ERRICO: (Guè, vì che nce teneva ncuorpo chesta!).

ANGIOLINA: Specialmente pò quanno nu marito è svelto, e pazzariello, quanno nu marito le fricceca lo sango dinto a li vene. Ah! na figliola se consola. Jamme dimme quacche cosa, cercheme nu vasillo, n’abbraccio, che non simme spusate? E che fa!... Pizziche, e vase non fanno pertose!... Erricuccio mio, volimmo campà cient’anne, volimmo stà sempe allegramente. Viva, viva, tra llà rà. (Alza la gamba. Giulietta dalla sinistra passa seconda a diritta, porta in mano un mazzetto di garofani.)

ERRICO: (Ma songh’io, o non songh’io chesta fosse asciuta pazza!).

ANGIOLINA: Dunque io me ne vaco, te raccomanno, spusammo ambresse, e non perdimmo tiempo!

ERRICO: Sì, sì, al più presto possibile. (E staje fresca!).

ANGIOLINA: Maretiello mio aggraziato!... Zuccariello mio teh... (Gli mena dei baci e via pel giardino.)

ERRICO: All’arma de la carta bianca!... E chi se la piglia? Manco si tenesse nu milione!

CLEMENTINA: Eccomi qua. (Salvatore la segue.) Dove sta D. Cesare?

SALVATORE: Jamme a vedé fore lo giardino.

CLEMENTINA (a Errico): Signore, buonasera.

ERRICO: Buonasera.

CLEMENTINA: Viva, viva tra llà rà! (Alza la gamba e via pel giardino con Salvatore.)

ERRICO: E chesta addà essere n’ata pazza!