IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
Cesare, poi Errico, poi Ciccillo, indi Felice.
CESARE (uscendo): Va trova sì Felice s’è ritirato... che veco? D. Gennanino Pagliuchella... e che sta facenno cu chella... (Avvicinandosi.) Signora, io conosco questo giovine e vi prego... signora... D. Gennarì. (Lo tocca e resta fermo.)
ERRICO (uscendo): D. Cè, diciteme na cosa... e ched’è neh... D. Cè... (Lo tocca e resta fermo.)
CICCILLO (uscendo): Neh signori miei... Uh! Quante so’ belle chiste!... Statue al naturale signori. (Suona la lanterna magica colla bocca, poi ad Errico.) Neh, sapete? Guè chillo non risponne... Neh, sapite... (Lo tocca e resta fermo.)
FELICE (d.d.): Ciccillo? Ciccillo? Addò sta chella bestia non se trova maje. (Fuori.) Uh! Che hanno combinato chiste? Lo sepolcro? E chi ha toccato lo bottone? Io assolutamente aggia levà sta poltrona da ccà. (Tocca il bottone, i cinque si svegliano.)
FELICE (gli tira un calcio): Lete da lloco, voluttà! (Ciccillo via.)
CESARE: Ma ch’è stato, che avimmo fatto?
FELICE (a Gennarino): Vuje pecché ve site assettato llà ncoppe? Questa è la poltrona estatica.
GENNARINO: E io che ne sapevo, scusate. Oh, che cosa graziosa.
FELICE: Ma che vulite da ccà? Pecché site venuto?
GENNARINO: Ah... io che so’ venuto a fare?... Ecco, vi ero venuto a fare una visita… ma mò s’è fatte tarde verrò un’altra volta. A rivederci. (Via di fretta.)
ERRICO: D. Cè, io so’ tornato pe ve dicere che io la porto ccà, ma badate che lo marito non m’ha da dì manco na parola, si no lo piglio a pacchere!
CESARE: Non ci pensate, sto io qua, và, fà ambressa.
ERRICO: D. Cè, ma scusate, nuje nce simme addurmute allerta allerta?
CESARE (a Clementina): Signora vi saluto.
FELICE: (Mò vide che passo n’ato guajo!).
CESARE: E brava, fusteve capace aieressera de darme nu pacchero, non aggio avuto mai nu paccaro in vita mia, chi me l’aveva dicere che a 58 anni, l’aveva avé da na femmena.
CLEMENTINA: Ma ve lo meretaveve, scusate, chelle non so’ parole che se dicene.
CESARE: Ma pecché ve pigliasteve collera?...
CLEMENTINA: Oh, chest’è bella, pecché me pigliaje collera? M’aveva piglià collera, afforza, scusate.
CESARE: Voi siete donna, e alle donne si perdona tutte cose. Però lo schiaffo che me disteve, io lo dette a lo marito vuosto, voglio vedé comme se regola.
CLEMENTINA: (Povero Felice, avette nu schiaffo pe causa mia).
FELICE: (Guè, Pasquale avette nu buffo).
CESARE: Felì, a me m’haje da dicere la verità, tu sì stato a la questura?
FELICE: Io? Nonsignore.
CESARE: Tu sì stato a la questura pe fà querela, ma io voglio che sta querela... te l’haje ritirà!
FELICE: Ma io...
CESARE (gridando): Te l’haje retirà... voglio accussì!
CLEMENTINA: (Avarrà fatto querela pe lo schiaffo che avette). Ma se capisce che se l’ha da retirà, che c’entra sta querela.
CESARE: Bravo, signora... Io ajeressera te trapazzaje nu poco, te dicette parole che non t’aveva dicere, feci male, ma che buò, lo carattere mio accussì è. Quanno m’attacchene li nierve, se chiudene l’uocchie, e non capisco niente cchiù. Tu certamente non sapive niente che nce steva scritto dinto a chillo biglietto, se no non me l’avisse dato, è vero?
CESARE: Tu lo ssaccio, non te putive maje aspettà chillo dispiacere. Ma che ce vò fà, lo munno accussì cammina, che te cride che sì sulo? Haje voglia quante ce ne stanno comme a te. Mogliereta pò in fondo, è na bona femmena, e comme l’aggio perdonata io, l’haje perdonà pure tu.
CLEMENTINA: (Ah, parla de lo schiaffo che l’aggio dato).
CESARE: Se capisce, t’è piaciuto de te piglià la mogliera bella. (Clementina si pavoneggia.) E qualche dispiacere l’haje d’avé pe forza.
FELICE: (Zi zì, stateve zitto nnanze a chesta, io non voglio fà sapé sti cose).
CESARE: (E me promiette de perdonà a mogliereta?).
FELICE: (Sissignore, la perdono).
CESARE: (Bravo! Io aggia accuncià tutte cose e pò parto, và te retira la querela).
FELICE: (Sissignore, mò vaco. Aspettateme dinto a lo salotto).
CESARE: (Fà ambressa, chella mò vene).
FELICE: (Chi?).
CESARE: (Mogliereta). (Sorpresa di Felice.)
CESARE: (Sì, la porta isso stesso, D. Errico).
FELICE (fra sé): (E stongo frisco!). Sentite zi zì, mò s’ha pigliata e se la tenesse!
CESARE: (Eh, isso t’ha da cerca scuse... se capisce, sta soddisfazione te la faccio avé!). Che cosa, statte zitto... Io t’aspetto dinto a lo salotto. (Via.)
FELICE: (Va bene trasite). (Cesare via seconda a destra.) (E comme faccio, comme arreparo cchiù!).
CLEMENTINA: Ma comme, Felì, tu sì ghiuto a fà querela, pe lo schiaffo che hai avuto?
FELICE: Chillo se l’ha creduto isso, ma te pare, io facevo querela a ziemo?