SCENA SECONDA

Pasquale e detta poi Rosina.

PASQUALE (da giardiniere con inaffiatoio): Luisè statte zitto famme stu piacere si no me faje venì na cosa. Napole bello... che canzona... la sentette pur’io... E li tre terature. (Canta.) Ma chi tene, ma chi tene la chiavetella...

LUISELLA: Nun alluccà, nun voglia maje lo cielo e te sente la signurina, faje marenna.

PASQUALE: Haje ragione chella quanno sente annummenà a Nina Boné, comme si sentesse lo diavolo. Ma che l’ha fatto chella povera fìgliola ca nce l’have tanto?

LUISELLA: Nun la pò vedé pecché tutte quante ne parlano bene, tutti li villeggiante de Puortece nce vanno pazze, e tutte li giuvinotte le fanno la corte.

PASQUALE: E se capisce, pecché chella se lo mmereta, è bona assai.

LUISELLA: Aracqua nu poco sti piante, fà ampressa, la signurina pe chesto te va truvanno.

PASQUALE: Eccome ccà.

LUISELLA: Ah! Nu poco de voce, avarria fatto cose de pazze. (Via a sinistra.)

PASQUALE: L’hanna fà la corte pe forza, pecché chella è na sciasciona, appena essa canta se magna tutta la platea, e quanno s’aiza chello poco la vesta... (Canticchia la canzonetta.) Jamme piglia, jammo piglia la chiavetella... (Vedendo Rosina.) Buongiorno oscellenza signurì.

ROSINA: N’ata vota che te sento cantà sta canzone, te piglio primma a cauce e pò te ne caccio... Haje capito?

PASQUALE: Va bene.

ROSINA: Vattenne fora mò.

PASQUALE: Vuleva aracquà li teste...

ROSINA: Nun fa niente, vattenne!

PASQUALE: Eccome ccà!

ROSINA: Haje capito mò! Primma te piglio a cauce e pò te ne caccio.

PASQUALE: Sissignore! (Vì che guajo ch’aggio fatto!). (Via fondo a destra.)

ROSINA: E tutte cu sta canzone, e tutte cu sta Nina Boné, me fanno attaccà li nierve.