SCENA SESTA

Achille e detti, poi Felice.

ACHILLE: Ma belle, belle veramente, nce stanno cierte ca parene pittate.

VIRGINIA: Achì, nce ne vulimmo j?

ACHILLE: Sicuro. A proposito... mi viene un’idea: pecché D.ª Rosina nun vene nu poco cu nuje?

ROSINA: Sarria nu gran piacere, ma nun pò essere, Felice ha da j a Torre del Greco a truvà nu zio sujo canonico che sta malato.

ACHILLE: E venite vuje sola, che male nce sta?

ROSINA: Io sola? E comme è possibile?

VIRGINIA: Ma se sape, chella lo marito nun lo lassa.

ROSINA: No, nun so’ io ca nun lasso a isso, è isso che nun me fa partì sola.

ACHILLE: E se pregato da me acconsentisse?

ROSINA: So’ sicura che Felice nun acconsente.

ACHILLE: E mò vedimmo. D. Felì scusate, venite ccà.

FELICE: Che c’è?

ACHILLE: Io e mia moglie dobbiamo chiedervi nu gran favore, una vera grazia.

FELICE: Una grazia? E di che si tratta?

ACHILLE: Io voleva ca fusseve partite cu nuje, ma D.ª Rosina ha ditto ch’avita j da nu zio vuosto canonico, e quindi per voi nun pò essere, ma nc’avita da lo permesso che nce purtammo la mugliera vosta.

FELICE: Essa? Sola?

ACHILLE: Non credo che dubitate di noi.

FELICE: Oh! Questo no!

ACHILLE: La facite divertì nu poco, e nello stesso tempo facite stà di j buon’umore anche mia moglie.

FELICE: Tu che dici?

ROSINA: Ma io faccio chello che vuò tu.

FELICE: Va bene, purtatevella. Ma però badiamo, per quanto tiempo?

ACHILLE: Nu paro de giorne, tre al massimo.

FELICE: Io resto cu Errico.

ERRICO: Resta affidato a me!

ROSINA: Allora vengo cu buje. Luisella?