SCENA SESTA

Orazio e detta e poi Paolo.

ORAZIO: Primma de fà marenna le voglio fà vedé lo ritratto de Cuncettella, l’aggia tenere dinta a la cammera mia! Che beco! Essa! Nepotema Cuncettella...

NINA: (Zi zio!). Zio mio caro caro!

ORAZIO: Oh, che bella sorpresa. E comme, io t’aggio scritto ca te veneva a truvà a Napule doppo dimane, e tu invece sì venuta ccà.

NINA: Pe ve vedé chiù ampressa zio mio.

ORAZIO: E bravo, bravo veramente. Comme te sì fatta bella.

NINA: Vuje pure state buono.

ORAZIO: Eh! Non c’è male. L’America me fa bene come denare e come salute. Mò bella mia so’ fenute le pene toje, zieto ha pensato pe te.

NINA: E io ve ringrazio. Ma zì zì. ve restate sempe a Napole.

ORAZIO: No, bella mia, mò che t’aggio vista, cumbino lesto na cosa, te sistemo e parto n’ata vota pe l’America. Oh, a proposito tu ccà nun sì venuta sola, chi t’ha accompagnata?

PAOLO: Il signore aspetta la signora nel n. 15.

NINA: Va bene.

PAOLO: Se volete qualche cosa, bussate il campanello. Permettete. (Sento na puzza abbrusciato, starrà piglianno sotto a la genovese!). (Via.)

ORAZIO: Aggio ntiso dicere: Il signore aspetta la signora nel n. 15, e chi è stu signore? Che te fusse mmaretata, dì la verità?

NINA: Sissignore, e me vedeva nu poco mbrugliata pe ve lo dicere.

ORAZIO: E pecché, anze me fa piacere, basta ch’è nu buono giovine. Che arte fa?

NINA: È... meccanico.

ORAZIO: Bravissimo! E comm’è, è nu bello giovine?

NINA: Nun c’è male, simpatico.

ORAZIO: E allora presentame, lo voglio conoscere.

NINA: Se sta facenno la barba, a n’ato poco ve lo faccio vedé.