IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
NINA (si dirige alla porta di divisione): Si può?
ROSINA: Chi è?
NINA: È Nina la canzonettista.
ROSINA: E che vene a fà ccà? Stasera fenesce malamente!
ERRICO: Vattenne dinto. (La spinge a sinistra. Rosina via.) Favorite.
NINA: È permesso di salutare la celebre Nina Boné?
ERRICO: Ma questo mi pare che non stà, che vulite fà succedere nu chiasso?
NINA: E pecché ha da succedere nu chiasso? Nuje simme doje figliole cuntente. Essa s’ha pigliato lo nomme mio, e io me piglio lo marito. Tenco nu palco de prima fila vicino a li scene, llà mi sento le canzonette.
ERRICO: Ma insomma, ccà che site venuta a fà?
NINA: So’ venuta per le dicere quacche cosa che fa bene a essa e fa bene a me. Quanno canta «Li tre terature» nun ha da fà troppe mosse, quella è una canzone che io la canto a fior di labbro, e quanno meno se move meglio fa... Quanno canta la «Sciampagnona» nun ha d’aizà troppo la gonna pecché nun s’usa cchiù, appena appena nu piccolo movimento, quando il pubblico vede poco, si entusiasma, vò vedé cchiù assaje e applaudisce, sono i segreti dell’arte, e poi non si sforzasse a cacciare molta voce, perché per le canzonette voce nun ce ne vò, tutto dipende dalla grazia.
ERRICO: Ma ve pare che vuje le venite a dicere sti cose e ccà nun succede lo trentuno? Finitela sentite a me, ritornate vuje chella che ireve e essa chella che era.
NINA: No, mò ha da cantà, l’aggia sentì, voglio vedé che fa. Si è femmena de carattere ha da cantà, ha da mantené la parola.
ERRICO: Ma capite che si ccà stasera succede nu scandalo, lo zio vuosto D. Orazio appure ca site na canzonettista e perdite 350 mila lire.
NINA: E chesto l’ha salvata, si no nce facevamo nu paliatone nummero uno.
ERRICO: Perciò evitiamo di fare uno scandalo. Felice addò sta?
NINA: Se n’è scappato e nun l’aggio visto cchiù.
ERRICO: E chillo certo ne piglia na malattia. Vedete che rovina!
NINA: Uh! E chesto è niente ancora, avite voglia de vedé!