SCENA PRIMA

CONCETTELLA (dal fondo): Quanto è simpatico lo nipote de lo sinneco... Da stammattina che è arrivato m’ha fatto stunà talmente che io non conchiudevo niente cchiù! Po’ tene na maniera... tene na voce accussì aggraziata ca non se po’ credere! Pe li servì a tavola, aggio rotto duje piatti e no bicchiere... Po’ se dice ca li femmene fanno perdere la capa all’uommene! Ce stanno cierti giovinotti che ce fanno perdere la capa, li gamme e tutte cose! Ah, eccoli qua!