SCENA PRIMA

Felice, poi Concetta.

FELICE (dall’interno apre la porta di destra con la chiave; entra, rinchiude a chiave e dice rivolto all’interno): Peppì, mena lo maniglione arreto... Eh... accussì... E quanno vene muglierema nun dì niente, pe carità!... (Viene avanti.) Mamma mia che nottata... che nottata! Mò moro!… Me sento li rine rutte! Fortunatamente muglierema nun s’è ritirata! Ma io vurria sapé si se ponno passà cchiù guaje de chille ch’aggiu passato io: (enumerando) nu muorzo de nu cane... vutamiento de capa... disturbo de stommaco... guardie... arresto... paure... Nun saccio comme so’ vivo!

CONCETTA (dall’interno, bussando): Don Felì!...

FELICE: Chi è?

CONCETTA (sempre dall’interno): Songh’io, D. Felì... aprite!

FELICE: E tirate lo maniglione! (Apre la porta con la chiave.)

CONCETTA (entrando): Che me dicite, D. Felì... Ch’avite fatto co lo Cummissario?

FELICE: Faciteme sapé primma vuje ch’avite fatto co lo marito vuosto!

CONCETTA: S’è ritirato n’ora doppo de me. Io aggiu fatto vedé che lo stevo aspettanno susuta... Ma che paura! Che paura!... Mò s’è svegliato e sta liggenno lo Matino! Io me so’ vestuta e l’aggiu ditto che me jeva a accattà nu velo pe lo cappiello. Luisella, la cammarera vosta, è venuta cca, ha tuzzuliato la porta, nun ha truvato a nisciuno e è trasuta dinto addu nuje. Io appena l’aggiu vista, l’aggiu fermata fora a la sala e l’aggiu regalato chella vesta che tenevo aieressera... pe chi sa l’avessa conoscere quaccheduno!

FELICE: Avite fatto buono! E D. Celestino?...

CONCETTA: Michele l’ha trovato stanotte abbascio a lo palazzo... Ha ditto che facette tarde e truvaje lo cullegio chiuso!

FELICE: Vì che mbrughione! Chillu jette ncoppa all’albergo nzieme cu Luisella!

CONCETTA: Dunque, ch’avite fatto co lo Cummissario? A me me facette mettere dinta a na carruzzella e me ne facette j. E a vuje?

FELICE: Da me vulette sapé afforza io pecché la notte me fingevo spirito ncoppa a chill’albergo e facevo mettere appaura la gente! (Riferendo il colloquio.) «Io?... Quanno maje? Io sono un galantuomo!» «Va bene, ritiratevi. Però domani dovete presentare, voi e la signora che se m’è andata, tutti i documenti necessari per stabilire la vostra identità.»

CONCETTA: E ca chesto è lo brutto! E comme se fa mò? Comme se fa? Si Michele appura stu fatto, io so’ rovinata!

FELICE: E io addò me vaco a mettere cu muglierema? Chella è na brigante... Chella lo cchiù poco m’accide!...