SCENA SECONDA

Ernesto e detti.

ERNESTO: Ma insomma... cosa fate quà? Avete inteso il campanello?

PEPPINO: Sissignore eccellenza.

CONCETTA: Mò proprio l’aggio ntiso, e steve venenno.

ERNESTO: Andate, la signora ha bisogno di voi, il bambino piange.

CONCETTA: Eccome ccà. (Io so’ venuta a fà la coca, no la nutriccia). (Via.)

PEPPINO: Eccellenza da me che comandate?

ERNESTO: Niente... niente... Peppì, grazie.

PEPPINO: Ma signurì, vuje pecché state accussì... che saccio stiveve tanto e buon umore e mò...

ERNESTO: Peppino mio, ho perduto la pace, il riposo, aggio desiderato pe tanto tiempo nu figlio, e mò che l’aggio avuto me veco talmente infelice che tu non puoi credere...

PEPPINO: Eh! Io lo dicevo.

ERNESTO: So’ duje mise ch’è nato, non saccio cchiù che vò dì durmì la notte. Mentre sto chiudendo ll’uocchie, chillo accummencia a chiagnere, e ghiette cierti strille ca me fa fà nu zumpo la vota. Stanotte va trove aveva tenè dulure de viscere, se sturzellava dinto a lo lietto comme a nu serpe.

PEPPINO: Io credo eccellè, ca lo pietto de la signora non le giova.

ERNESTO: Accussì aggio supposto pur’io.

PEPPINO: Pecché non pigliate na nutriccia?

ERNESTO: L’aggio penzato; nce lo dicette a D. Rafele lo miedeco, lo quale stammatina me ne manna una. T’assicuro Peppino mio, ca stanotte m’aggio visto proprio perduto, strillava de na manera tale ca pareva ca tanto mureva, chella povera Nannina non sapeva cchiù che aveva fà, capirai lo primmo figlio... se vede mbrugliata la puverella.

PEPPINO: E se capisce, è primmo figlio.

ERNESTO: Ah! A proposito, Peppì... aiere me screvette na lettera papà, dicennome che veneve a passà 3 o 4 mise ccà, t’arraccumanno fa truvà tutto sistimato, tu saje chillo quanto è fastidioso.

PEPPINO: Non dubitate, ve pare.

ERNESTO: Priparele chella stanza c’affaccia dinto a lo giardino, chillo è amante de vedè li frasche.

PEPPINO: Va bene... vaco subito a priparà... (Via a destra.)

ERNESTO: Quanno sta papà ccà, sto cchiù cuiete... la nutriccia che vene penza pe lo piccerillo, e chella povera Nannina se po’ pur’essa arrepusà nu poco.