SCENA TERZA

Felice (con piatti), poi Peppino, indi Rafele.

FELICE: Eppure nun pozzo penzà lo fatto de stanotte senza ridere... L’aggio attaccate a tutte e duje, e ce l’aggio fatto capità comme a pacche postale.

PEPPINO: Guè, che fai lloco cu sti piatte, tu l’haje da purtà da parte de dinto.

FELICE: Guè, e nun te vutà de chesta manera!

PEPPINO: Comme m’aggia vutà? Io me voto comme è duvere de me vutà... Quanno nun sapite fà lo carneniere, jate a fà lo munnezzaro, lo pulezza stivale.

FELICE: Tu sei un servitore, comme a me, e non hai il diritto di comandarmi.

PEPPINO: No, io lo tengo stu diritto, pecché io so’ primmo de te, tu stai al disotto di me.

FELICE: Peppì, non me ncuità, pecché io te tengo nganne a te! (S’è scurdato lo fatto de stanotte!)

PEPPINO: Ah! Me tiene nganne?... Seh! n’aggio tanto piacere! Mò nun staje cchiù buono ccà, mò è meglio ca te ne vaje.

FELICE: Vattenne, me ne vaco! (Gli cade un piatto.)

PEPPINO: Eh! Haje fatto chesto!... Haje rutte li piatte...

FELICE: Ecco... ecco... li piatte... la servitù come si vede... la cattiva gente... l’esagerazione... io uno piatto aggio rutto, già s’ingrandisce la cosa... già si allarga... è inutile, io ccà nun me ce trovo miezo a sta gente... Io sono un signore, pateme teneva la carrozza...

PEPPINO: Fà poche chiacchiere, e arrune sti grastale.

FELICE: Chiste non me vonno lassà j... (Si calano.)

PEPPINO: Sangue de Bacco, vene gente!... Mò me la filo io! (Via, Felice si nasconde sotto il tavolo.)

RAFELE: Chesta me pare la pazzarìa... la coca sta comme a na diavola, non ce sta proprio speranza de mangià! Neh! A me comme m’è venuto ncapo de venì ccà ncoppa! (Felice per prendere un pezzo del piatto, tocca la gamba di Rafele.) Chi è... passa llà!... Che nce sta quacche cane ccà sotto?... (Vede Felice.) Uh! Vuje che state facenno lloco?

FELICE: Sto passeggiando.

RAFELE: E già, chello è la Villa de lo Popolo!

FELICE: Nonsignore, eccellenza... io avevo rutto nu piatto e steve arrunanno li grastale.

RAFELE: E m’avite fatto mettere chella paura, io me penzavo ch’era nu cane ca se vuleva mangià la coscia... Io l’aggio ditto, chesta è la casa de li pazze!... (Via.)