IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
SCENA PRIMA
Rita e Rosaria che lavorano ed Antonio dal fondo.
ANTONIO (con latte e caffè): D. Rì, D. Rusà, pigliateve lu latte e cafè, ve l’aggio carrecato de zucchero.
RITA: Io non ne voglio.
ROSARIA: E io nemmeno.
ANTONIO: Comme non volite fà marenna?
ROSARIA: Io me magnarria l’aria a morza a morze.
RITA: Io darria la capa nfaccia a lu muro.
ROSARIA: Si avesse nu poco de veleno me lo bevarria.
RITA: Si non stesseme a piano matto, me menarria abbascio.
ANTONIO: Eh! Chiano chiano, pecché volite fà chesto? Vuje site figliole, io lu capisco pecché state accussì; non ve piace chillo che ve vò dà lu zio vuosto, e chesto è pe buje e va bene... ma vuje pecché state accossì arraggiata?
ROSARIA: Sto arraggiata pecché zi zio non me vò fa fà l’ammore, dice ca so’ piccerella, e non me vò fà mmaretà, quanno po me mmarito quanno so’ vecchia?
RITA: Pe te la cosa è niente, pe me è gruosso lu guaio. Io faccio l’ammore cu Pulicenella, lu voglio bene assaie, comme me ne pozzo scurdà.
ANTONIO: Ma lu zio vuosto chesto lo sape?
RITA: No, non sape niente, e chi nce lo faceva sapè? Non voglia lu cielo. Chillo s’ha puosto ncapo che m’ha da fà sposà pe forza a chillo francese, chi lo persuade? Mannaggia quanno maje fuje chillo juomo che se presentaje.
ANTONIO: E non ve pigliate po’ tanta collera, che ne sapite li cose comme vanno?.., chi sa... sperate.
RITA: E ch’aggia da sperà? Non c’è da sperà niente, zi zio sta ammoinato de chella manera, lu francese da poche juorne è partito ed è ghjuto a Parigi pe portà ccà tutte li carte pe spusà, dinto a sti juorne vene, se cumbina lu matremmonio e io comme faccio? Ah! Io l’aggio jurato, o me danno a Pulicenella, o me jetto dinto a no puzzo!
ANTONIO: Guè quà puzzo e puzzo, chesto non l’avite da dì.
ROSARIA: Mò siente Antò, io pure la penzo accossì, che ne faje de li denare, de la nobiltà, de li grandezze? Va tanto nu bello piccerillo accuoncio, aggraziato, simpatico, che uno ch’è ricco, ma che non te va a genio.
ANTONIO: è giusto, ed io l’approvo. Evviva la bellezza, la miseria e l’amore.
TUTTI: Evviva! (in tuono d’allegria.)