IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
Ciccillo e detti, poi di nuovo Ciccillo di dentro.
CICCILLO (dall’interno, bussando): D. Felì... D. Felì...
CONCETTA (spaventata): Chi è?!...
FELICE (alla porta): Chi è?...
CICCILLO (interno): Songh’io, D. Felì...
FELICE (a Concetta): Nun avite appaura: è Ciccillo, lo giovene mio! (Alla porta.) Ciccì, ched’è?...
CICCILLO (sempre dall’interno): Tengo nu dispaccio pe vuje! Mò proprio l’hanno purtato!
FELICE (apre la porta. Ciccillo entra): Damme ccà, Ciccì... Vattenne abbascio a lo palazzo e si vide de venì a muglierema, curre subito a m’avvisà!
CICCILLO: Va bene. (Esce. Felice rinchiude.)
FELICE: Nu dispaccio? E che sarrà? (Apre e legge:) «Attendiamo mia sorella da ieri. Perché non venuta? Telegrafate. Luigi»... Lo frate de muglierema?... E comme, essa nun è stata llà?... (Con sollievo.) Fosse morta pe la strada? Cielu mio, sulo nu miraculo de chisto me putarria salvà!
CONCETTA: D. Felì, che pensate? Che risolvete?... Io nun pozzo fà sapé a lo cummissario che invece della signora Sciosciammocca, era la signora Galletti... lo ccapite o no?
FELICE: D.ª Cuncettì, io lo capisco... ma che volete da me?... Io mi trovo nella stessa vostra condizione.
CONCETTA: M’avite nguajata! M’avite precipitata!...
CICCILLO (internamente): D. Felì... D. Felì...
FELICE: N’ata vota! (Alla porta.) Ciccì, che vuò?
CICCILLO (internamente): Sta saglienno li ggrade la signora... D.ª Rosa... la mugliera vosta!
FELICE: Muglierema! Ciccì... votta lo maniglione addereto e saglietenne a lo terzo piano! (Toglie la chiave dalla porta.)
FELICE: (rapido, a Concetta): D.ª Cuncettì, nun ve facite vedé, pe carità! Jatevenne dinta a la cucina!... Anze, mò che me ricordo, pigliate lo mangià mio... tutte cose... e menatelo abbascio a la vinella... pure lo vino!
CONCETTA (meravigliato): E pecché?
FELICE: Chell’era lo mmangià mio d’ajeressera... Pe nun lo ffà truvà, capite?
CONCETTA: E si chella trase dinta a la cucina e me vede, che lle dico?
FELICE: Io la trattengo... nun la faccio trasì... Jate... Jate!...
CONCETTA (avviandosi): Mamnaggia ll’anima vosta, mannaggia! Và trova comme va a fernì stu fatto! (Via per la sinistra.)
FELICE (solo): E ce vò tanto a capì comme fernesce! A mazzate! (Si sente aprire la porta a destra.) La vì ccà!