IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
ROSA (entra. È pallida, disfatta, abbattuta, ha sulla fronte una lividura coperta da un cerotto): Felicie’... Feliciello mio, cumme staje?...
FELICE: Comme aggia stà? Aggiu fatta la nuttata chiara chiara!
FELICE: E ched’è, nun lo ssaje? Senze de te nun pozzo chiudere uocchio!
ROSA (commossa): Povero Feliciello... Ma mai cchiù... mai cchiù te lasso!
FELICE: Ma ch’è stato?... Che tiene nfronte?
ROSA: Io so’ viva pe miracolo!... Pe miracolo nun so’ morta!...
FELICE: Ma pecché... Io mò aggiu ricevuto nu dispaccio da fratete Luigi: vò sapé pecché nun ce sì ghiuta! Addò sì stata?
ROSA: Aspetta nu mumento... famme piglià fiato pecché nun me fido!… (Siede.) Haje da sapé, Feliciello mio, che ajere ssera, quanno me ne jette da ccà, me mettette dinta a na carruzzella... me facette aizà lo mantice e steveme cammenanno tantu bello tutte e tre...
FELICE: Tutte e tre?
ROSA: E già: io, lo cucchiere e lo cavallo... (Concetta esce da sinistra e in punta di piedi attraversa durante il racconto.) Quanno tutto nzieme... a la Riviera de Chiaia... chillu cànchero de cavallo pigliaje la mano e se mettette a correre!... Tu può immaginà... tutte quante, mmiezo a la strada se mettettemo alluccà... Io, pe la paura, nun tenevo cchiù fiato! Vôta pe Santa Lucia... pe lo Chiatamone... e nientemeno ce steva precipitanno a mmare! (Concetta è uscita a destra.)
FELICE (sollevato per l’uscita di Concetta): E bravo!...
ROSA: E bravo che me menavo a mmare?
FELICE: No... io volevo dire: te steva menanno a mmare?... E bravo... Ebbiva a isso!... (A parte.) (Era venuto lo mumento!...)
ROSA (continuando il racconto): Allora io, spaventata, me menaje... e ghiette cu chesto nterra... (Mostra la fronte.) La folla attuorno a mme accussì... lo sangue... che nun ce bastavano fazzulette pe l’asciuttà! Stette nterra cchiù de n’ora svenuta... pò rinvenette... e sentevo tutta la gente che diceva: «Uh, povera signora... e copritela... copritela...».
FELICE: Ma pecché, cumm’ire caduta?
ROSA: Eh! Felice mio... che nne saccio!... Pò me vulevano purtà ccà... «No - dicette io - ... e chillu povero Feliciello, si me vede accussì... de chesta manera... lle pò venì na cosa!»
FELICE: Tu si venive ccà facive nu guajo!... (chella nun me truvava!).
ROSA: Fortunatamente me ricurdaje che a Santa Lucia ce sta de casa lo cumpare... me facette purtà llà… me medicajene... pò m’addurmette... e appena fatto juorno me ne so’ venuta!
FELICE: Vuje vedite lo diavolo! (Con esagerata premura.) E te fa male... te fa male?...
ROSA: Mò nun tanto… ma stanotte so’ ghiuta pe ll’aria! Feliciè fammo lo piacere... dàmme nu bicchiere d’acqua!
FELICE: Sì... mò faccio spilà la funtanella... te la dongo fresca fresca!... (Con rammarico.) Ma vedite che diavolo de cumbinazione... So’ ccose che me toccano li nierve!... Pecché io dico accussì: stu cavallo ha pigliato la mano?... (E vòttala a mmare!)... e fermati subito!... So’ ccose tremende! (Via a sinistra.)
ROSA (commossa): Povero Feliciello... na nuttata sulo e chiuso da dinto! (Con proponimento.) Da oggi in poi me contento de cammenà a ppede... ma carruzzelle mai più!