SCENA DECIMA

Eduardo, poi Attanasio, indi Giulietta.

EDUARDO (entra nella trattoria): Nun sta manco abbascio a lo palazzo, e addò è ghiuta essa sola, fosse trasuta ccà. (Via a sinistra.)

FELICE (esce dall’armadio): Io mò moro, lassaterne fuì. (P.a.)

ATTANASIO (dalla destra): Sangue de Bacco, aggià vedé si è essa.

FELICE: Mamma mia! Mò lo viecchio me trova ccà ncoppa! E comme la combino? (Apre la porta di comunicazione ed entra.) (Mariuccia!)

GIOVANNINO: (Guè, Felì?).

FELICE: (Giovanni. Puozze passà nu guaio!).

GIOVANNINO (Tiene, miettete chesta nfaccia!). (Gli dà una maschera che Felice mette in fretta.)

ATTANASIO (traversa il fondo ed entra nella trattoria col revolver in mano): M’è passato pe nnanze nu Pagliaccio, scappava comme a che, essa aveva essere, mò vedimmo si nun la ncoccio! (Via a sinistra.)

PASQUALE: Giovinò, vuje m’avite rovinato, vuje nun sapite fà niente. (S’alza.) Và, Mariù, jammoncenne, salutateme a D. Gaetano, chillo mò sta affarato. Felice sera. (Felice e Giovannino salutano.) Chiste quanto so’ brutte! (Via con Mariuccia pel fondo.)

GIOVANNINO: Felì, ch’è stato? E muorto?

FELICE: Io nun tengo cchiù sango ncuollo!

GIOVANNINO: Ma pecché?

FELICE: Dinto a la trattoria sta lo nnammurato de Faustina.

GIOVANNINO: Tu che dice?

FELICE: Facimmo la spia si se n’è ghiuto. (Si mettono a guardare nella serratura della porta di comunicazione.)

GIULIETTA (da pagliaccetto con mascherino in mano): Accussì sto bona. (Vede i 2.) Ah! gente! (Si copre il volto.)

GIOVANNINO (vede Giulietta): Guè, Faustì, io sto ccà! (Si leva la barba.) Jammoncenno, fuimmo. (Viano pel fondo.)