SCENA QUARTA

Felice e detto.

FELICE: Eccomi qua. Che veco! D. Faustina!

CECILIA: Questo signore chi è?

NUNZIATA: Comme chi è. E lo nnammorato tujo. D. Alberto Cicirello.

CECILIA: Voi che dite! Nun è isso!

NUNZIATA: Comme, vuje nun site D. Alberto?

FELICE: Nonsignore!

NUNZIATA: E non m’avete detto niente?

FELICE: Non m’avite dato tempo de parlà.

NUNZIATA: E chi siete?

FELICE: Io sono Felice Sciosciammocca.

NUNZIATA: E sta lettera comme la tenite vuje?

FELICE: Fuje na pazzia che facette, dicette lo cammariere che io me chiammava D. Alberto.

CECILIA: Mò aggio capito.

FELICE: Vuje stiveve vestuta da pagliaccetto, ve site cagnato vestito?

CECILIA: Io?

FELICE: Giovannino addò sta?

CECILIA: Chi Giovannino?

FELICE: Si ve trova D. Attanasio facite marenna.

CECILIA: Che saccio che state dicenno, chi ve cunosce.

FELICE: Guè, mò nun me cunosce.

NUNZIATA: Neh, mio signò, vi prego di finirla, noi non sappiamo chi siete, perciò vi prego d’uscire!

FELICE: Va bene, la signorina non mi conosce, non fa niente.

NUNZIATA: Uscite!

FELICE: Ma io...

NUNZIATA (gridando): Uscite!

FELICE: Signora vi prego di credere, che io sono un galantuomo, sono di Nocera, sono venuto in Napoli per sposarmi la figlia di un certo D. Pasquale Brasciola!

NUNZIATA: D. Pasquale Brasciola! Che sento! Voi siete lo sposo della figlia, lo miedeco!

FELICE: Sissignore.

NUNZIATA: Uh! Chillo se credeva che stiveve facendo visite, che combinazione, D. Pasquale sta a lo buffè nzieme co la figlia, stanno qua, jammolo a truvà, venite.

FELICE: Ah! D. Pasquale sta dentro? Ah! che piacere! (Aggio passato lo guaio!)

NUNZIATA: Venite, e stasera voglio conoscere lo vero D. Alberto.

CECILIA: Ah, zia mia! (Viano a sinistra.)

FELICE: D. Pasquale ccà ncoppa, avarria essere pazzo a trasì dinto, mò me ne vaco.