SCENA SECONDA

Papele e detti poi Carmeniello di nuovo.

PAPELE (esce, e guarda intorno): Non è venuta ancora, ma poco potarrà tricà. (Siede.)

ANIELLO: Sta tutte cose scritto, senza che allucche! (Starnuta.) Na zuppiera de porcellana, quatte bicchiere e otto piatte.

CARMENIELLO: Quà zuppiera, quà otto piatte?...

PAPELE: Cameriè?...

CARMENIELLO: La zuppiera era sengata, li piatte, quatte li rumpette lo cuoco, e po’ chelle sò disgrazie che succedono a tutte li locale. No compagno mio a la strada de lo Duomo, rumpette no servizio de tazze nuovo nuovo, e lo patrone non nce la facette pavà, sulo ccà dinto se vedene sti pirchiarie...

PAPELE: Cameriè?...

ANIELLO: Ogne locale tene l’use suoje... pirchiarie, e non pirchiarie mò me staje seccanno bastantamente sà Carmeniè, fa lo dovere tujo si no nce ncuitammo.

CARMENIELLO: Io lo dovere mio lo saccio, e lo faccio, ogge, dimane, e Martedì, pecché vuje non sapite conoscere la gente.

ANIELLO: No, tu non saje conoscere lì bone azione! Voglio vedé silo truove n’auto locale come a chisto!

CARMENIELLO: E io voglio vedé chi v’accompagna la sera fino all’ultimo piano.

ANIELLO: (Haje ragione... aggio da tenere afforza prudenza, mannaggia la podagra!). Pe na cosa de niente s’hanno da fà tanta chiacchiere. Viene ccà, non ne parlammo cchiù, facimmo chello che avimmo da fà. Vivete no bicchiere de Marsala.

CARMENIELLO: Nonsignore, ve ringrazio.

ANIELLO: Viene ccà t’aggio ditto, vive!

CARMENIELLO: Ma pecché, lassate stà.

ANIELLO: Voglio accossì, o me faje nfucà mò! (Carm. beve e beve un bicchiere anche lui.) Tu lo ssaje, io te voglio bene comme a no figlio, ma cierti bote me faje piglià collera.

CARMENIELLO: Vuje n’auto comme a me non lo trovate.

ANIELLO: Va buono, femimmola mò, non ne parlammo cchiù.

PAPELE: Sapete? Vuje po’ quanno avite fatto me lo dicite?

CARMENIELLO: Signore, scusate.

PAPELE: E che scusate e scusate! Questa mi pare che non sia maniera di trattare gli avventori, ccà non è trasuto uno qualunque sà!

CARMENIELLO: Abbiate pazienza, un’altra volta starò più attento.

PAPELE: Speriamo. Perché se no non finisce così!

CARMENIELLO: Sapete, vuje comme la tirate a luongo, ccà nisciuno v’ha fatto niente, ve sto dicenno scusate, abbiate pazienza, mò me ne facite j de capo!

PAPELE: Sta bene, mò va bene!

CARMENIELLO: Che v’aggio da servì?

PAPELE: Io sono il figlio del Barone Corniscione, papà sta fuori per affari mi ha rimasto a Napoli in casa di una sua sorella, la Marchesa Cornicelli, e andavo all’Istituto, condotto e diretto dal professore Camillo Capone, lo sapete, il fratello dell’antiquario?

CARMENIELLO: Sissignore, stanno nell’istesso palazzo addò abitammo io e lo patrone mio.

PAPELE: Siccome adesso abbiamo prese le feste, io invece di mangiare in casa di mia Zia la Marchesa, vengo a mangiare qua.

CARMENIELLO: Bravo! Chesto me fa piacere! Ma a me che me ne preme.

PAPELE: No, ve voglio fà sapere pecché vengo a mangiare quà, voi potreste dire c’è il caffè d’Europa, c’è il gran Caffè, locali di lusso, degni di voi è vero? No, voglio mangià ccà! E pecché? Ci deve essere una ragione?... Mò vi dico la ragione.

CARMENIELLO: (Vì che bello tipo che è chisto!).

PAPELE: Jerisera Patanella mi disse che oggi sarebbe venuta a cantare in questa trattoria...

CARMENIELLO: Patanella?... E chi è sta Patanella?...

PAPELE Na bellezza, na cosa rara! Come non lo sapete? Chella che va cantando assieme al fratello per tutti i caffè e le trattorie, si chiama Giulietta, ma io la chiamo Patanella, perché è proprio na patanella, ce vado appresso da due mesi, se papà l’appura sò rovinato, ma che me ne mporta a me, o Patanella o la morte!

CARMENIELLO: Basta, volite niente?

PAPELE: Se capisce, debbo mangiare, essa così mi ha detto, se no il fratello se n’accorge e la bastona.

CARMENIELLO: E che desiderate?

PAPELE: Fate voi, io mangio tutto.

CARMENIELLO: Mò ve porto na porzione de lasagne al forno, na genovese con patate, e no fritto? Comme ve pare?

PAPELE: Benissimo! Approvo!

CARMENIELLO: (Vì che gente vanno cammenanno per lo munno!). (Via a destra.)

PAPELE: Io credo che starà pe venì, pecché me sento sbattere lo core... quanto è bella! Quanto è cara! Peccato che non è nobile come me... e che me ne mporta, quando sarà mia moglie diventerà Baronessa! (Aniello starnuta.) — Felicità —.

ANIELLO: Grazie. Ma non ve n’incaricate non me dicite niente, io starnuto sempe, è no catarro cronico.

PAPELE: Ah? Neh? è stato buono che me l’avite avvisato.

CARMENIELLO (con piatto): Ecco servito. Che vino volete bere?

PAPELE: Quello che volete voi, io sono indifferente.