IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
CAMILLO: D. Aniè, buongiorno.
ANIELLO: Carissimo D. Camillo.
PAPELE: (Sangue de Bacco, lo Direttore dell’Istituto, Cameriè, metteteve nnanze pe ccarità!). (Cerca nascondersi.)
CARMENIELLO: (Che è stato?).
PAPELE: (Non me voglio fà vedé).
CARMENIELLO: Che cos’è D. Camì, che ghiate facenno da chesti parte?
CAMILLO: Siente Carmeniè. Siccome oggi è l’ultima Domenica di Carnevale, mio fratello Alessio, l’antiquario, l’è venuto lo golio de mangia cca.
CARMENIELLO: Vuje che dicite! E quanno maje D. Alessio s’è muoppeto de la casa?
CAMILLO: So’ stato io che l’aggio spinto, l’aggio ditto: movimmoce no poco, chesto che cos’è, pigliammo na vota no poco d’aria, alla fine che potimmo spennere? Isso ha acconsentito, ma saje pecché?
CAMILLO: Pecché aieressera, Marietta la nepota, facette cosa de lo diavolo, se mettette a alluccà: io non voglio fà cchiù sta vita, sempe nzerrata dinta a quatte mura, si dimane non me facite ascì no poco, me votto dinto a lo puzzo!
CARMENIELLO: Povera figliola, have ragione, non vede maje li prete de Napole, sempe chiusa.
CAMILLO: Non se pò affaccià manco a la fenesta, tutte cose ribbazzate.
CARMENIELLO: Ma pecché fa chesto?
CAMILLO: Eh, pecché?... io mò te pozzo dicere... pecché ha perduta la capa, vularria che chella guagliona se spusasse a isso.
CARMENIELLO (ridendo): Uh! Mamma mia, vuje che dicite!
CAMILLO: Eh! Che dico, chillo sbarea sempe.
CARMENIELLO: Ma comme, pretenne che na guagliona comme a chella se mette vicino a isso ca tene da coppa a 60 anne? E vuje non le dicite niente?
CAMILLO: E che vuò che le dico neh Carmeniè? Tu sai la mia posizione, io ncè sto soggetto, m’ha dato doje cammere dinta a la casa soja pe senza niente, e accossì potette arapì l’istituto. Sul principio le diceva quacche cosa ma pò aggio visto lo tuosto, e non me ne so’ incaricato cchiù.
CARMENIELLO: E se capisce.
CAMILLO: Ma vide pò che ommo curioso, pretenne che la guagliona l’ha da volé bene, se l’ha da spusà, e pò le fà desiderà na vesta, no cappiello...
CARMENIELLO: Vì che piezzo d’assassino! Ma è ricco, è ricco?
CAMILLO: Ricco?... E che ne vuò sapé figlio mio, quello è omo de 4, 5 milioni!
CAMILLO: No, apposta: chillo sta ricco assai, e intanto chi lo vede non l’apprezza duje centeseme, ha guadagnato assaje co li forastiere, e guadagna ancora, specialmente coi quadri antichi, con le statue. E la matina annevìna quanto s’ha da spennere dinta a la casa? Pe me, isso, la govemante, e la nepote, si te lo dico non lo cride... sei lire pe lo pranzo, e doje lire pe la cena.
CAMILLO: Figurete, nce assettammo a tavola co appetito, e doppe mangiato nce morimme de famma!
CARMENIELLO: Ah, ah, ah! Chesta è bella!
CAMILLO: Perciò Carmeniè, io l’aggio persuaso a venì ccà, ma te raccomanno, na cosa terra terra, isso ha ditto che vò spennere pure lo doppio de chello che spenne a la casa pe lo pranzo.
CARMENIELLO: Cioè, dodici lire?
CARMENIELLO: Quanto Site?
CARMENIELLO: Tre lire a testa... mò vedimmo, v’acconcio io na cosa, so’ chesti ghiornate, capite?
CAMILLO: Vide tu, pe la regalia a te nce penzo io.
CARMENIELLO: Va bene, non ve n’incarricate.
CAMILLO: Oh! N’auta cosa, isso ha ditto che vò venì quando non nce sta tanta folla.
ALESSIO: Allora avite da venì priesto, e ve n’avite da j a li tre, si no trovate ammoina, ve mettite a sta tavola ccà. (Indica a destra.)
CAMILLO: Va buono, mò li faccio vestere e venimmo... Siente Carmeniè, n’auta cosa, a lo pizzo mio, chisto ccà lo vì, nce miette na bottiglia de vino de Posilleco, a lo pizzo suje pò miette chelle che vuò tu.
CARMENIELLO: Va bene, nce penzo io.
CAMILLO: A proposito Carmeniè, n’ata cosa.
CARMENIELLO: N’ata cosa?
CAMILLO: Chiste so’ na porzione de manifeste che io aggio fatte stampà per l’Istituto, me faje lo piacere, li miette pe coppa a li tavole, è un avviso al pubblico che col primo di quaresima, nella mia scuola, c’è lezione di francese, disegno e ballo.
CARMENIELLO: Va bene, dateme ccà. (Prende i manifesti.)
CAMILLO: Grazie tanto. Nuje a n’auto ppoco venimmo, statte buono. D. Aniè a rivederci.
ANIELLO: Carissimo... carissimo... (Fa per satarnutare.)
CAMILLO: Va buono, aggio capito. (Via.)
CARMENIELLO: E chisto è n’auto bello tipo!
PAPELE: Carmeniè no bicchiere d’acqua.
CARMENIELLO: Subito. (Gli dà l’acqua.) Ma che è stato, vuje avita fatta la faccia bianca?
PAPELE: Quello è il direttore dell’istituto dove vado io, se mi vedeva qua dentro, lo scriveva a papà, e statevi bene, sono stato con una paura che non potete credere.
CARMENIELLO: E pecché sta paura, a la fine che state dinto a no bigliardo?
PAPELE: Eh! voi non sapete papà quando è tremendo.
CARMENIELLO: Basta, v’avite mangiata la lasagna?
PAPELE: Tutta quanta.
CARMENIELLO: V’è piaciuta?