SCENA SECONDA

Alessio e dette poi Camillo.

ALESSIO: Quanno state commode de venì me lo dicite?

VIRGINIA: Scusate D. Alè, steve dicenno na cosa a la signorina.

ALESSIO Aggio ntiso poveriello, chi è sto poveriello?

VIRGINIA: Poverielro?... E chi ha ditto poveriello?

MARIETTA: Io no certo.

VIRGINIA: E io manco.

ALESSIO: Sissignore, lo stiveve dicenno vuje proprio, poveriello!

VIRGINIA: Ah! sissignore, mò me ricordo, la signurina m’ha contato che aieressera lo muscillo l’ascette tanta sango da lo naso, e io aggio risposto: poveriello!

ALESSIO: Lo muscillo l’ascette lo sango da lo naso?

VIRGINIA: Sissignore.

ALESSIO: E pure Donna Virgì, lo pensiero me dice ca lo sango da lo naso ve lo faccio ascì a vuje.

VIRGINIA: A me? E pecché?

ALESSIO: Pecchesto! Io quanno chiammo voglio essere risposto subito! Iateme a piglià lo ccafè.

VIRGINIA: Eccome ccà. (Via a destra.)

ALESSIO: Io lo Cielo lo ssape che nottata che aggio passata, chello ppoco che aggio dormuto, m’aggio sunnato fiamme, pompiere, guardie, popolo... mannaggia all’arma de la mamma addò sta mò, vedite che pazzie che se vanno facenno, a rischio de fà venì nu tocco a no poverommo! Lo core me lo diceva: statte dinta a la casa, non ascì! Chillo cancaro de Camillo per forza volette fa la campagnata! Bella cosa! Va tanto no poco de brodo dinta a la casa, cujeto, senza seccature, che tutte li piatte de li tratturie! Dimme na cosa Mariè, chi erano chelli figliuole che t’accompagnarono ccà?

MARIETTA: Stevene dinta a la trattoria, non li conosco.

ALESSIO: E tu sempe co sta maniera, sempe co sta malagrazia. Viene ccà, assettete vicino a me che t’aggia da parlà seriamente. (Siede.)

MARIETTA: (Lo ssolete, mò accominciammo). Eccome ccà. (Siede.)

ALESSIO: Ajere te mettiste appaura ovè?

MARIETTA: Eh, ve pare, se trattava de n’incendio. Io pò non capisco pecché ammentà tanta buscie.

ALESSIO: Pazziajene, bella mia, chillo cheste vanno facenna. Ma sbagliajene però, l’incendio nce steva, ma no dinto a sto palazzo.

MARIETTA: E addò ne Zizì?

ALESSIO: Ccà, mpietto a me.

MARIETTA: Mpietto a vuje!

ALESSIO: Sì, mpietto a me, ed è un incendio, che nemmeno tutti i pompieri del mondo possono smorzare, mi brucia sempre.

MARIETTA:Vuje chedicite! E non ve facite vedé?

ALESSIO: (è inutile, non capisce, non capisce!).

VIRGINIA: Ecco ccà lo ccafè. (Con caffè.)

ALESSIO (prende la tazza): Va buono, jate a arricettà la cammera.

VIRGINIA: Sissignore. D. Camillo m’ha addimmannato de vuje, l’aggio ditto che stiveve ccà.

ALESSIO: Va bene. (Virginia via a sinistra.) Siente ccà Manié... sienteme buono, e rispunneme a dovere.

MARIETTA: Parlate.