IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
Dorotea, Feliciello con cartella e detti.
FELICIELLO (uscendo): Zi zi.
DOROTEA: Trase. Caro D. Asdrubale, vi saluto: carissima D. Lucrezia, come state?
LUCREZIA: Non nc‘è male. (Si baciano.)
FELICIELLO: Maestro (gli bacia la mano.), Signora D. Lucrezia... D. Mariuccia...
MARIUCCIA: (Te voglio chiavà no punio nfronte, pecché...).
FELICIELLO: Zi zi...
DOROTEA: Haje baciato la mano al maestro?
ASDRUBALE: Sì signora, me l’ha baciata.
PULCINELLA: A me ancora la deve baciare.
FELICIELLO: Zi zi...
DOROTEA: Bacia la mano anche al signore.
ASDRUBALE: Nonsignore, quello scerza. (Piano a D. Felice.) Neh, zi zia ha portata la mesata?
FELICIELLO: (Gnernò).
FELICIELLO: Perché!... Zi... Zi...
ASDRUBALE (a Felice): (Zitto!).
FELICIELLO: Il maestro vi saluta.
DOROTEA: Io l’aggio salutato. Grazie.
LUCREZIA: E comme và, che site venuta vuje stammatina?
DOROTEA: Lassateme sta, che m’aggio pigliato no cuofene de collera. Felì...
FELICIELLO: Zi zi.
ASDRUBALE: Eccoci qua... D. Felì, sedete...
FELICIELLO: Son pronto. (E per quale ragione Mariuccia me vò dà no punio nfronte?)
ASDRUBALE (leggendo): Il Diluvio...
PULCINELLA: Che d’è sta chiovenno?
ASDRUBALE: Levate da lloco, e lassece fà.
DOROTEA Avite da sapè che io tengo quinnece ducate a lo mese e la casa franca, pecché maritemo era maggiore, e per conseguenza a morte sua m’è attoccata la pensione, e che per averla ogne mese, me piglio no zeffunno de collera...
ASDRUBALE (c.s.): Noè... punto e virgola.
FELICIELLO (distratto guardando Mariuccia): Perché?
ASDRUBALE: Pecché? Pecchesto... pecché nce vò punto e virgola...
FELICIELLO Va bene... (Ah! che io mi strangolerei!)
DOROTEA: Figuratevi, cara D. Lucrezia, che è no guaio, no vero guaio. Primma de tutto, v’avite da caccià la fede de vita e nce vò na lira e duje solde, po’ l’avite da portà a lo notaro, chillo ve fà lo certificato si site vedova veramente, pò doppo co lo borderò mmano avito da jre ad esigere li denare mmiezo a na folla, mmiezo a tanta gente, e cierte matine ve n’avite da j senza niente, pecché non potite passà...
LUCREZIA: Nientemeno! (E de li cinche franche chesta non ne parla!)
ASDRUBALE: Orribilmente col te non con d... (Correggendo.)
FELICIELLO (c.s.): Nonsignore.
ASDRUBALE: Perché nonsignore?...
FELICIELLO: Che avete detto?
ASDRUBALE: Orribilmente col te, col te, te.
PULCINELLA (porgendo la mano): Che m’haje da dà?
ASDRUBALE: Niente. Lassace fà scola.
FELICIELLO: Ah, va bene, ho capito... (Ah! se potessi sapere)...
PULCINELLA: E mò pecché pazzie, dice primma te, e doppo non me dà niente.
FELICIELLO-PULCINELLA (a due): Zi zi.
FELICIELLO: Maestro, che ora sarà?
ASDRUBALE: Mezzogiorno passato;
DOROTEA: Mezzogiorno. Ecco ccà, mò nientemeno da ccà aggio da jre n’autra vota ncoppa a le Finanze, pecché nce so’ ghiuto stammatina e tanto de la folla men’aggio avuto da jre. Ah, è no guaio, è no guaio! (Si alza.) D. Asdrù, io me ne vaco, ve raccomanno. Guè, appena haje finito de fà scola ritirate, non me fà stà co lo pensiero. Ah! cara D. Lucrezia, che volite che ve dico io vaco pazza pe sto nepote mio, isso sulo m’è rummaso... E pò io l’aggio da volè bene pe forza, pecché povero guaglione non tene né mamma a né patre. Va, stateve bene. Felì...
FELICIELLO: Zi zi...
FELICIELLO: Va bene. (Dorotea via.)
PULCINELLA: E li cinche lire?
ASDRUBALE: Le volimmo spennere tutte quante stammatina.
FELICIELLO: Io credo che si sarà dimenticata.
ASDRUBALE: Cheste non so’ cose che se scordano.
PULCINELLA: Figurammece per esempio che io non tenesse li quinnece solde stammatina. Comme se faciarria?
ASDRUBALE: Dalle co sti quinnece solde.
LUCREZIA: Intanto chell’era la speranza nosta, e mò... (E comme! E la nasceta mia e aggia da stà senza la marenna!) Aspè... Pulicené, damme mezza lira...
PULCINELLA: Chesta è essa. (Dà la mezza lira.)
LUCREZIA (ad Asdrubale): Asdrù, mò ne manno a piglià latte e pane, e facimmo almeno marenna.
LUCREZIA: Nicò... (Chiamando.)