IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
SCENA PRIMA
Mariuccia e Anselmo che entra.
ANSELMO: (La vì ccà chella guagliona che m’ha levata la pace!). Buon giorno. Come state?
MARIUCCIA: Non nc’è male... Assettateve... (Gli dà una sedia.)
ANSELMO: Grazie... grazie, cara D. Mariuccia... (Guè, io mò era venuto ccà ncoppa accussì arraggiato, e mò vedenno a chesta so’ addeventato no piccerillo.) E accossì, papà non nce sta?
MARIUCCIA: Gnorsì, sta dinto, si volite che ve lo chiammo, mò vaco...
ANSELMO: No, no, aspetta, non fa niente, lassalo stà: parlammo no poco tutte e duje... Ma che d’è, non saccio comme te veco! Che è succiesso?
MARIUCCIA: Na disgrazia, caro D. Anselmo.
ANSELMO: (Uh, ha ditto caro!). Na disgrazia, e quale?
MARIUCCIA: Avite da sapè che lo frate de papà nce aveva mannato pe mezzo de n’amico sujo seimila lire, nuje nce l’avimmo pigliate, e nce l’avimmo astipato dinto a lo comò. Simmo asciute pe accattà quacche cosa da magnà, cierte scarpe, na vesta pe me, e ccà nc’è rimasto zi Pulicenella. Simmo tricato nò cchiù de n’ora e no quarto: tornanno ccà, avimmo trovato la porta aperta, zi Pulicenella mbriaco, e li denare mancante.
ANSELMO: Nientemeno! E chi è stato lo mariuolo?
MARIUCCIA: Chi lo ssape? (Piange.)
ANSELMO: E non chiagnere. Mariuccia mia: ma pecché ve servevano sti denare?
MARIUCCIA: Comme, ve pare! Nce avevamo da levà tutte li diebbete, avevamo da pavà a vuje...
ANSELMO: Ih, fosse chisto tutto ho male. Io aspetto quanto vuò tu, e si tu volisse, non solo non ne parlarria cchiù de sto debbeto, ma quanto sta casa sarrìa la toja. (Carezzevole.)
MARIUCCIA: (Uh, mall’arma de mammeta! E chist’autro nce mancava! Fignimmo). Sì volesse io? Comme s’intende?
ANSELMO: E che sò io... questo poi lo sai tu...
MARIUCCIA: Ma si vuje non ve spiegate.
ANSELMO: Ecco qua... Mariù... Haje da sapè...