SCENA QUARTA

 

Don Giovanni, don Peppe «'o siciliano» il 3° secondino e detti

 

Aperta la porta don Peppe spinge dentro don Giovanni. I carcerati si allineano, squadrando quest'ultimo con sospetto e curiosità.

 

Don Peppe

 

(sulla soglia, a don Giovanni)

 

Trasiti, don.... cumme vi chiamati. Truvativi u puosto, spugghiativi e curcativi.

 

Don Giovanni

 

Mme dispiace 'e v'incumudà. Aggio lassato 'a mappetella abbascio, ncopp'a nu scanno...

(Al suono della sua voce Peppe Pazzia si volta, sorpreso: don Giovanni gli volge le spalle)

 

Don Peppe

 

Bravu! Bonu cuminciamo!

 

Don Giovanni

 

Ve cerco scusa...

 

(Peppe Pazzia s'alza)

 

Don Peppe

 

E iu uora vi servu. Uora 'a vai a pigghiu. (esce)

(Don Giovanni guarda la porta che si chiude, poi si volta e si trova faccia a faccia con Peppe Pazzia )

 

Don Giovanni

 

(sbalordito)

Tu!...

 

Peppe

 

(non meno sorpreso)

Vuie! Don Giuvà!...

 

Don Giovanni

 

Tu'... cca' dinto!... Peppe Pazzia!...

 

Peppe

 

'On Giuvanne!... Vuie mmiez'a nuie!...

(Un silenzio, durante il quale i due si guardano come non credendo a se stessi. Don Giovanni è al colmo dell'emozione, ma cerca padroneggiarsi).

 

Don Giovanni

 

'E visto?... So' benuto int' 'a cummertazione!

 

Peppe

 

C'avite fatto?!...

 

Don Giovanni

 

C'aggio... fatto?... (lo guarda come se gli volesse leggere dentro nell'anima. Lo sforzo ch'egli fa per parere indifferente è chiaro) Pò' t' 'o ddico... E tu?...

 

Peppe

 

(spallucciando)

M'hanno pigliato pe suspetto... pe causa 'e nu richiaramento... Assettateve... (trae nel mezzo della scena una scranna. Don Giovanni siede, come spossato) Signori mieie! (i carcerati si fanno avanti) Pe revula vosta e cu rispetto 'e tutta 'a cummertazione, v'appresento st'amico d' 'o mio.

(Don Giovanni si alza e si toglie il berretto e saluta. Tutti si sberrettano).

 

Rafele

 

(sberrettandosi)

Pe parte 'e tuttu quante se saluta cu duvere.

 

Peppe

 

É n' ommo ca se mmereta tutte 'e riguarde pussibbele e avite fa comme si fosse i' stesso. (Don Giovanni ascolta, sorridendo, ironico) Ntennimmece buono: stu signore nun pava uoglio p' 'a lampa, se po' scegliere 'o pizzo che bo', e si vo' rialà a quaccheduno riala schittamente a chi lle fa 'o lietto. Ce sta nisciuno c'ha dda fa usservazione?

 

Rafele

 

(si fa avanti, solenne)

Sta mmordo bene.

(Ciascuno torna al suo letto)

 

Peppe

 

Dunque... 'On Giuva', ccà state int' 'a casa vosta.

 

Don Gennaro

 

(E ha fatto stu bello quatto 'e maggio!)

 

Don Giovanni

(a Peppe)

 

Ve ringrazio... E mo?...

 

Peppe

 

Mo?... Nn' 'o bberite? Ce cuccammo. Tenite suonno?

 

Don Giovanni

 

Niente.

 

Peppe

 

Embè... si vulite viglià, vigliammo. Aggio durmuto fino a mo e nun tengo suonno manco io. Si premmettete ve faccio cumpagnia.

 

Don Giovanni

 

E... 'o carceriere?

 

Peppe

 

È amico. (strizzando l'occhio) Mo che bene a purtà 'a mappatella lle mmuccammo quaccosa 'e renare e stammo cchiù sicure. Nu' se' carrì, chest'è tutto...

 

Don Giovanni

 

(lacera la fodera della giacca e ne cava denaro)

Chest'è 'a muneta.

 

Peppe

 

Vedite... è na murtificazione!... Sta muneta l'avesse caccià semp'io... Ma... comme se dice...

 

Don Gennaro

 

(A rimettere).

 

Peppe

 

Quanno ascimmo a' llibertà...

 

Totonno

 

(dalla porta)

Sta venenno 'on Peppe.

 

Peppe

 

(a don Giovanni)

Quartiateve 'a chella parte.