IntraText Indice | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText | Cerca |
I link alle concordanze si evidenziano comunque al passaggio
Amalia - Nunziata - poi Cristina
'Onn'Amá!... 'Onn'Amá!... (La scuote) Embé?... E
(levandosi di scatto e voltandosi)
Addo' sta?
Aspettate, embe'?... Vuie ll'avite pigliá c' 'o buono... Iammo... asciuttateve st'uocchie...
Addo' sta?...
Sta ccá fora, 'o puntone... 'A pozzo chiammá?
(meno vivamente)
Sí... chiammatela...
(alla porta, facendo cenno con la mano)
Psst!... Bella figlió!... Trasite!...
(entrando, soffermata sulla soglia)
Bonasera. (Pausa. Donn'Amalia si volta lentamente e la guarda. A donn'Amalia) Che v'aggia servì?
E trasite... (ironica) Che ve mettite paura?
Me metto paura?... (entrando risoluta) 'E che?
Assettateve...
(a Cristina)
Assettateve... (siede anche lei).
Mme n'aggia i', scusate, aggio che fa. Si mm'avite dicere quacche cosa, aggiate pacienza, dicitemmello ampresso ca mme n'aggia i'...
Nunziá, nun sia pe cumanno, chiudite nu poco chelli lastre. (Nunziata si leva, chiude la vetrata e rimane, tornando, impiedi) Bella figlió! (a Cristina, levandosi lentamente e posando la mano sulla tavola) Nunziata nun v'ha parlato 'e niente?
Sissignore, m'ha ditto quacche cosa...
(a Nunziata)
(a Cristina)
A chi aggia risponnere, a vuie o a essa?
(Indica Nunziata che fa segno di non volerne sapere).
Avite risponnere a me, bella mia. Chesto so' cose ca riguardano a me schittamente.
(amara)
'O ccapisco. (Pausa. Nunziata si volta, guardando alla vetrata. Amalia, ritta presso alla tavola vi si appoggia con la mano. Cristina impiedi avanti a lei ha le mani nelle saccocce del grembiale).
Dunque?
Dunque che?
Comme nce 'a mangiammo sta menesta?
Diciteme na cosa, bella figlió, a mme m' hanno ditto ca vuie facite ammore cu don Vito 'o tintore...
E ca isso... ve vo' pure spusà...
Gnorsí...
(moderandosi a stento)
Embe', 'o vedite... Vuie mm'avarrisseve fa na finezza...
(c. s.)
(Dopo aver dato uno sguardo alla porta)
'A finezza ca mm'avarrisseve fa... ll'avarrisseve dicere vuie stessa ca stu fatto nun po' essere...
Eh, seh, a don Vito, a don Vito!...
Pecché nu' po' essere, 'o vedite... Vuie 'o ssapite vuie stessa ca nu' po' essere... (a Nunziata) Nunziá, parlate pure vuie, dicitecello... Ve pare ca po' essere?...
(confusa)
'Onn'Amá, io che ve pozzo di'? Me pare... che saccio...
I' che saccio?... (a Cristina) Bella figlio', e parlate pure vuie! Vuie nun dicite niente?
E c'aggia di'? Anfí a mo chello c'aggio ntiso aggio ntiso ca nu' po' essere. E va bene. Ma pecché nu' po' essere? Si nu' ve spiecate!...
Sentite, bella figlio', ce stanno cierti cose ca s'avarriano rentennere senza ca uno se spiecasse tanto...
Io so' nu poco ngnurante, che v'aggia di'?
Embé quanno è chesto ca vuie site ngnurante, o vulite fa abbedé 'a ngnurante... io mo' v' 'o dico tale e quale... (Guarda alla porta) Sentite, bella figlio'... Vuie credo ca ve ne site addunata ca io parlo cu vuie e tremmo soccia soccia...
(come ironicamente compassionandola)
(fremente)
E pecché chisto, pe tutte 'e riguarde, è nu brutto mumento pe me. Io ve vurria di' tutto chello ca mme passa p' 'a capa... ma... iarriemo troppo a luongo... È meglio ca mme faccio anema e curaggio e v' 'o dico una vota e bona... Vuie a Vito l'avite lassá... Pecché stu fatto nu' po' essere, avite capito? Nu po' essere!... Ce stanno tant'uommene ncopp'a terra e vuie ve site iuto sciglienno iusto a chillo! 'O ssapite ca chillo sta malato?... Sentite a me, scigliteve a n'ato. Vuie 'o truvate... Anze, vedite che ve dico, io sarria pure 'a femmena 'e v' 'o truvá. Sentite. Rispunnite a me. Vuie 'a ntenzione vosta qual'è? Chella 'e ve luvà 'a sta vita che state facenno, nun è overo?
(fredda)
Embé, io ve torno a ripetere ca ve voglio aiutà! Nuie facimme 'e modo e manera ca vuie ve luvate 'a dinto 'a disgrazia vosta e a Vito nun ce penzate cchiù... Che dicite?
(cocciuta)
Voglio a Vito.
(fremendo, ma moderandosi)
E sentite... Faciteme finí 'e dicere... Vuie site na bona figliola...
(c. s.)
(c. s.)
Nonzignore, accussí è... Io me so' nfurmata e se so' truvate tutte quante una voce dicente... Vedite... si date audienzia a me, sora mia, io ve dico a buie ca doppo m'annummenate e dicite: Chella donna Amalia aveva ragione e io ll'aggia ringrazià c' 'a faccia pe terra... Sentite... Parlammece chiaro... Vuie tenite diebbete? Io v' 'e levo sotto 'o córpo. Vuie che vulite 'e carte a ll'ispettore subbeto subbeto? E io, cu 'e canuscenze meie, v' 'e faccio avé pure dimane matina. Ve servessero denare? Parlate. Ccá stongo io. Che v'aggia di' cchiù? (quasi commossa) Vulite sti rusette che porto 'e recchie? 'E vulite? E io v' 'e dongo... (fa l'atto di togliersele).
(arrestandole la mano)
Voglio a Vito.
(giungendo le mani e dando un'occhiata alla porta)
Uh, Madonna mia, e che capa 'e calavrese neh! Meh, bella figlio'!...
(ad Amalia che è rimasta muta, addossata alla tavola, gli occhi a terra, le mani in grembo)
Mm'avite di' nient'ato? Si nun mm'avite di' niente ato cchiú io mme ne vaco. Bonasera. (per uscire).
(ad Amalia)
Me', 'onn'Amá!... (a Cristina) Bella figlio', mme dispiace 'e vuie! I' che saccio, v'avarrisseve avuta fa capace!
Ma... 'e che? Vuie mme chiammate ccà dinto, mme vulite dà denare, mme vulite fa caccià 'e carte a ll'ispettore, mme vulite rialà 'e rusette... (sorride amaramente). Ma che pazziate o facite overo? Ma vuie 'o ssapite ca si mo tengo nu vascio pe durmí io pavo 'a mesata cu 'e denare mieie, c' 'o sango mio? Io mangio pane e pane pe nun cercá niente a nisciuno! Io nun aggio avuto niente 'a nisciuno, avite capito? Io nun voglio niente 'a nisciuno! Io voglio a Vito Amante.
Vuo' a Vito, vuo'?!... 'E tu te cride ca na femmena comme a te se po' pigliá a nu figlio 'e mamma comme a chillo?
Chesto nun ll'avarissive dicere vuie!
(gridando)
Vito Amante nun se sposa a na mala femmena!
(per afferrarla, Nunziata la trattiene)
T' 'o dico n'ata vota, sí! E si vuo' fa buono, vattenne!
Aspettate!... (ad Amalia) Ma si facite accussí vuie nun ve cumbinate nè mo nè maie!
Ma vuie 'o bedite chella cumme se vota? Ma 'o bedite ca mme vo' mettere cu 'e spalle nfaccia 'o muro? (a Cristina) Ma che mme vuó' fa fa nu guaio? Tu mme vulisse fa fa nu guaio? (Disperata, singhiozza) Uh, Madonna mia! Chesta mme vo' fa passà nu guaio overamente! (ricade a sedere).
Nun avite appaura ca nun 'o passate 'o guaio!
Siente!...
Parlate c' 'a vocca!... 'E mmane 'o pizzo loro!...
Siente!... Te voglio di' n'ata cosa... Viene ccà (la conduce davanti al comò) Dimmello nnanze a Dio!... Tu 'o vuo' bene overamente? 'O vuo' bene overamente?
O vuo' bene cchiú 'e me? 'O canusce 'a quanno 'o canosco io? E tutto chello c'aggio fatto io pe isso tu l' 'e fatto, tu? 'A quanto tiempo 'o saie? Tu 'o saie a nu mese; e io 'o saccio 'a quatto anne! Tu pe isso ch' 'e fatto? Niente. E io pe causa soia nun so' cchiú guardata 'nfaccia d' 'a gente! Tu 'o saie mo ca sta buono e io 'o saccio 'a quanno steva malato, e mme mannava a chiammá, e io passavo 'e nuttate chiare chiare vicino 'o lietto suio. E mo' te ne viene tu e t' 'o vuo' spusá? Ma che l' 'e' truvato 'n terra? Ma che ssi' pazza o mme vuo' fa ascí pazza a me? (Lasciandole la mano e respingendola) No, tu nun t' 'o spuse! Siente a me ca nun t' 'o spuse! Io te scippo ll'uocchie 'a fronte, nfama, scellarata che si'!... (fa per avventarsi).
Gue'! Gue'! P'ammore 'e Dio! (Si frappone)
Mo' mme pare ca ve n'abusate, avite capito?...
Iatevenne, mo... Va, iatevenne...
(ad Amalia)
'E tutto chesto ca mm'avite ditto io ve ne faccio cercà cunto, 'o ssapite!... (s'avvia alla porta).
Tu a me?!... Grannissema...
(mettendole la mano sulla bocca)
(a Cristina, che fa per uscire)
E mannammillo a stu nnammurato tuio, ossá!...
Va buono. Pe mo' avite raggione vuie... Bonasera!... Nunziá, bonasera... (esce).
(disperata, convulsa, cadendo a sedere appiè del letto)
Uh, mamma mia! E io comme aggia fa? (Singhiozzando) Nunziá!... E io comme faccio?
C' 'o buono no e c' 'o peggio manco! 'I che capa tosta!
E mo' comme aggia fa? Dicite vuie!
'Onn'Amalia mia, e io che ve pozzo di'?... (leggero tuono in lontananza. Annotta). Ched'è, vulesse vení pure a chiovere? (S'accosta alla porta e guarda fuori) Mamma, ma', e comme s'è fatto niro 'o tiempo! E io che tengo 'e llenzola fora 'a loggia!... 'Onn'Amá, ve lasso 'a bona nuttata...
(si leva)
No, Nunziá, nun ve ne iate!...
'Onn'Amalia mia, tengo 'e lenzola for'a loggia. 'E voglio trasí primma ca vene a chiovere... (si accosta alla porta e torna a guardare) Se sta apparicchianno na brutta trubbea! Abbasta ca dimane a sera nun ce ntussecammo Piererotta!... (Tornando subito) Uh, 'onn'Amá!... Mme pare ca sta venenno 'on Vito 'a chesta parte!...
(che, fra tanto, accende un lume)
Chi?... Vito?...
(guardando fuori)
Isso è, isso è!... Sta parlanno cu Cristina, a 'o puntone... Facitemmenne i' a me, aggiate pacienza!...
Aspettate!...
No, no, mme ne vaco, mme ne vaco... Bonasera... bonasera... (Si gitta lo scialle in capo e fa per scappare. Poi torna). Mo mme scurdavo 'o raso in lana!... (Afferra il pacchetto che aveva lasciato sulla tavola e scappa) Bonasera!... Felice notte...
(Corre allo specchio e vi si rimira. Si asciuga gli occhi in fretta. Quindi continua a far mostra di pettinarsi. Si sente di fuori un colpetto di tosse, e un «buonasera» scambiato fra due uomini. Vito compare sulla soglia).