VENI, CREATOR SPIRITUS

            I.

Veni, Creator Spiritus

Mentes tuorum visita,

Imple superna gratia

Quae tu creasti pectora.

            II.

Qui diceris Paraclitus

Altissimi donum Dei,

Fons vivus, ignis, charitas

Et spiritalis unctio.

            III.

Tu septiformis munere

Digitus paternae dexterae,

Tu rite promissum Patris,

Sermone ditans guttura.

            IV.

Accende lumen sensibus,

Infunde amorem cordibus,

Infirma nostri corporis

Virtute firmans perpeti.

            V.

Hostem repellas longius,

Pacemque dones protinus

Ductore sic te praevio

Vitemus omne noxium.

            VI.

Per te sciamus da Patrem,

Noscamus atque Filium

Teque utriusque Spiritum

Credamus omni tempore.

            VII.

Deo Patri sit gloria,

Et Filio qui a mortuis

Surrexit, ac Paraclito,

In saeculorum saecula. Amen.

25