1 locutusque est Dominus ad Mosen et Aaron
dicens
2 loquimini filiis Israhel et dicite eis
vir qui patitur fluxum seminis inmundus erit
3 et tunc iudicabitur huic vitio subiacere
cum per momenta singula adheserit carni illius atque concreverit foedus humor
4 omne stratum in quo dormierit inmundum erit et
ubicumque sederit
5 si quis hominum tetigerit lectum eius lavabit
vestimenta sua et ipse lotus aqua inmundus erit usque ad vesperum
6 si sederit ubi ille sederat et ipse lavabit
vestimenta sua et lotus aqua inmundus erit usque ad vesperum
7 qui tetigerit carnem eius lavabit vestimenta sua
et ipse lotus aqua inmundus erit usque ad vesperum
8 si salivam huiuscemodi homo iecerit super eum qui
mundus est lavabit vestem suam et lotus aqua inmundus erit usque ad vesperum
9 sagma super quo sederit inmundum erit
10 et quicquid sub eo fuerit qui fluxum seminis
patitur pollutum erit usque ad vesperum qui portaverit horum aliquid lavabit
vestem suam et ipse lotus aqua inmundus erit usque ad vesperum
11 omnis quem tetigerit qui talis est non lotis
ante manibus lavabit vestimenta sua et lotus aqua inmundus erit usque ad
vesperum
12 vas fictile quod tetigerit confringetur
vas autem ligneum lavabitur aqua
13 si sanatus fuerit qui huiuscemodi
sustinet passionem numerabit septem dies post emundationem sui et lotis
vestibus ac toto corpore in aquis viventibus erit mundus
14 die autem octavo sumet duos turtures aut
duos pullos columbae et veniet in conspectu Domini ad ostium tabernaculi
testimonii dabitque eos sacerdoti
15 qui faciet unum pro peccato et alterum in
holocaustum rogabitque pro eo coram Domino ut emundetur a fluxu seminis sui
16 vir de quo egreditur semen coitus lavabit
aqua omne corpus suum et inmundus erit usque ad vesperum
17 vestem et pellem quam habuerit lavabit
aqua et inmunda erit usque ad vesperum
18 mulier cum qua coierit lavabitur aqua et
inmunda erit usque ad vesperum
19 mulier quae redeunte mense patitur fluxum
sanguinis septem diebus separabitur
20 omnis qui tetigerit eam inmundus erit
usque ad vesperum
21 et in quo dormierit vel sederit diebus
separationis suae polluetur
22 qui tetigerit lectum eius lavabit
vestimenta sua et ipse lotus aqua inmundus erit usque ad vesperum
23 omne vas super quo illa sederit quisquis
adtigerit lavabit vestimenta sua et lotus aqua pollutus erit usque ad vesperum
24 si coierit cum ea vir tempore sanguinis
menstrualis inmundus erit septem diebus et omne stratum in quo dormierit
polluetur
25 mulier quae patitur multis diebus fluxum
sanguinis non in tempore menstruali vel quae post menstruum sanguinem fluere
non cessat quamdiu huic subiacet passioni inmunda erit quasi sit in tempore
menstruo
26 omne stratum in quo dormierit et vas in quo
sederit pollutum erit
27 quicumque tetigerit eam lavabit vestimenta sua et
ipse lotus aqua inmundus erit usque ad vesperum
28 si steterit sanguis et fluere cessarit
numerabit septem dies purificationis suae
29 et octavo die offeret pro se sacerdoti
duos turtures vel duos pullos columbae ad ostium tabernaculi testimonii
30 qui unum faciet pro peccato et alterum in
holocaustum rogabitque pro ea coram Domino et pro fluxu inmunditiae eius
31 docebitis ergo filios Israhel ut caveant
inmunditiam et non moriantur in sordibus suis cum polluerint tabernaculum meum
quod est inter eos
32 ista est lex eius qui patitur fluxum
seminis et qui polluitur coitu
33 et quae menstruis temporibus separatur
vel quae iugi fluit sanguine et hominis qui dormierit cum ea
|