1 victori pro liliis testimonii Asaph canticum
2 qui pascis Israhel ausculta qui ducis quasi gregem
Ioseph qui sedes super cherubin ostendere
3 ante Efraim et Beniamin et Manasse
suscita fortitudinem tuam et veni ut salvos facias nos
4 Deus converte nos et ostende faciem tuam
et salvi erimus
5 Domine Deus exercituum usquequo fumabis
ad orationem populi tui
6 cibasti nos pane flebili et potasti nos
in lacrimis tripliciter
7 posuisti nos contentionem vicinis nostris
et inimici nostri subsannaverunt nos
8 Deus exercituum converte nos et ostende
faciem tuam et salvi erimus
9 vineam de Aegypto tulisti eiecisti gentes
et plantasti eam
10 praeparasti ante faciem eius et stabilisti
radices eius et implevit terram
11 operti sunt montes umbra eius et ramis
illius cedri Dei
12 expandit comas suas usque ad mare et
usque ad Flumen germina sua
13 quare dissipasti maceriam eius et
vindemiaverunt eam omnes qui transeunt per viam
14 vastavit eam aper de silva et omnes
bestiae agri depastae sunt eam
15 Deus exercituum revertere obsecro respice
de caelo et vide et visita vineam hanc
16 et radicem quam plantavit dextera tua et
filium quem confirmasti tibi
17 succensam igni et deramatam ab increpatione
faciei tuae pereant
18 fiat manus tua super virum dexterae tuae et super
filium hominis quem confirmasti tibi
19 et non recedemus a te vivificabis nos et nomine
tuo vocabimur
20 Domine Deus exercituum converte nos et
ostende faciem tuam et salvi erimus
|